مغربی بنگال کے شمالی 24 پرگنہ کے ٹیٹا گڑھ میں واقع سنبما جوٹ مل کو انتظامیہ اور مزدوروں کے درمیان جاری تنازعہ کے باعث مل کو بند کئے جانے کے خلاف مزدوروں نے احتجاجی مظاہرہ کیا اور بی ٹی روڈ کو جام کر دیا، جسے بعد میں پولیس نے خالی کرایا اور آمد و رفت کو بحال کرایا۔
درگا پوجا سے قبل جوٹ مل کے بند ہونے سے مزدور وں کی پریشانیوں میں اضافہ ہو گیا ہے۔ مل انتظامیہ کے اس فیصلے کے خلاف مزدور سڑک پر اتر آئے اور سڑک کی ناکہ بندی کردی جس سے ٹرافک نظام متاثر ہو گیا۔
مزدوروں کا کہنا ہے کہ کئی مہینوں سے تنخواہ میں اضافہ، بونس اور دیگر سہولیت فراہم کرنے کے متعلق مسلسل احتجاج کیا جارہا تھا۔ مزدوروں کا کہنا ہے کہ اس ضمن میں مل انتظامیہ سے کئی مرتبہ میٹنگ ہوئی تھی لیکن انتظامیہ مطالبات ماننے سے انکار کرتا رہا ہے۔
انہوں نے کہا کہ آج صبح مزدور جب کام کے لئے کارخانہ پہنچے تو انہوں نے گیٹ پر مل بند کرنے کا نوٹس دیکھا۔ دوسری طرف مل انتظامیہ کا کہنا ہے کہ اس وقت مزدوروں کے مطالبات قبول نہیں کئے جا سکتے ہیں کیونکہ مل اس وقت بھاری نقصان میں ہے۔
پولیس نے جائے وقوع پر پہنچ کر حالات کو قابو میں کیا اور مزدوروں کو سڑک سے ہٹا کر آمدرفت دوبارہ بحال کیا۔
درگا پوجا سے ٹھیک پہلے جوٹ مل بند ہونے سے مزدوروں کو کئی دشواریوں کا سامنا کرنا پڑ رہا ہے۔ مغربی بنگال میں درگا پوجا سب سے بڑا تہوار ہے۔