دور جدید میں علماء کرام کی ذمہ داریاں پہلے کے مقابلے زیادہ

حضرت مولانا مفتی سالم اشرف مہتمم دارالعلوم اشرفیہ دیوبند نے جوکی ہاٹ میں واقع تنظیم تحفظ شریعت ویلفیئر سوسائٹی کی جانب سے منعقدہ پروگرام سے خطاب کرتے ہوئے کہاکہ' موجودہ دور میں علماء پر امت کی ذمہ داریاں پہلے سے زیادہ ہوگئی ہیں، آج علماء کرام کو اپنا دائرہ وسیع کرنے کی ضرورت ہے، علماء کو دینی علوم و فنون کے ساتھ عصری علوم اور جدید ٹیکنالوجی پر باریک نگاہ رکھنے کی ضرورت ہے، زمانے کے ساتھ ساتھ مسائل اور وسائل میں تبدیلی آئی ہے، شریعت سے ہم رجوع کریں اور اس مسئلہ کا حل قرآن و سنت کی روشنی میں کریں۔

جمعیت علماء ارریہ کے جنرل سکریٹری مفتی اطہر القاسمی نے کہا کہ' آج علماء کرام کو عملی طور پر خود کو بدلنے کی ضرورت ہے، ہمیں پہلے خود عمل کر کے دکھانا ہوگا، پھر ہم دوسروں سے توقع کریں، آج خیر کا کام پہلے علماء کرام کو اپنے گھر سے شروع کرنے کی ضرورت ہے۔

ہمیں گفتار کا غازی نہیں بلکہ کردار کا غازی بننا ہے اور دکھانا ہے۔ حضرت مولانا صغیر احمد شریف قاسمی مدرس مدرسہ مسیح العلوم بنگلور نے کہا کہ' علماء انبیاء کے وارث ہیں، علماء کی صحیح رہنمائی سے ایک اچھا معاشرہ تشکیل پاتا ہے، اگر صحیح رہنمائی نہیں کی گئی تو اسی طرح معاشرے میں بگاڑ آتا ہے۔

مہمان خصوصی حضرت مولانا مصطفیٰ رفاعی جیلانی خلیفہ شیخ زکریاؒ نے کہا کہ’ آج علماء کرام کو ہر میدان کا شہسوار بننا ہے، معاشرے کو خواندگی کی طرف بیدار کرنا ہے اور اس کی ہمہ جہت کوشش کرنی ہےڈ پروگرام میں تنظیم تحفظ شریعت کے کنوینر مولانا عبد الوارث قاسمی نے تنظیم کے اغراض و مقاصد پر روشنی ڈالی ساتھ ہی تمام مہمانوں کا استقبال اور تحائف پیش کئے۔