صوبہ جموں کی دو پارلیمانی نشستوں پر اپنے امیدوار نہ اُتارنے کے پیپلز ڈیموکریٹک پارٹی کے فیصلے سے نالاں پارٹی کے سابق ایم ایل سی اور ایک سرکردہ رہنما فردوس ٹاک نے پارٹی سے اودھم پور۔ڈوڈہ حلقہ پر لیے گئے فیصلے پر نظر ثانی کی اپیل کی۔
جموں کے گاندھی نگر علاقے میں ایک پریس کانفرنس سے خطاب کرتے ہوئے انہوں نے کہا کہ میں نے اس سلسلہ میں پارٹی کے پارلیمانی معاملات کی کمیٹی میں ایک نظر ثانی کی پٹیشن دائر کی ہے اور پارٹی سے اودھم پور لوک سبھا نشست کے لیے کئے گئے فیصلے پر نظر ثانی کی اپیل کی ہے۔
انہوں نے مزید کہا کہ پارٹی کے فیصلے کے بعد سول سوسائٹی اور یوتھ انجمنوں کی دیگر جماعتوں نے ایک مجموعی فیصلہ لیا تاکہ پارٹی کے سیاسی معاملات کی کمیٹی کو اس فیصلے سے آگاہ کیا جا سکے۔
انہوں نے کہا کہ ہمارے پاس اپنا دعویٰ پیش کرنے کی ایک خاص وجہ ہے۔
انہوں نے کہا کہ پارٹی کے حلقے سے امیدوار نہ اُتارنے کے فیصلے سے حلقے کو تمام سیاسی پارٹیاں نظر انداز کر رہی ہیں۔ حلقے کی تفصیلات دیتے ہوئے انہوں نے کہا کہ حلقے کے چھ اضلاع میں تقریباً24 لاکھ کی آبادی ہے جس میں وادی چناب کی آبادی کا نصف حصہ ہے۔
انہوں نے کہا کہ کانگریس ،بی جے پی سمیت دیگر پارٹیاں وادی چناب کی 50 فیصدی آبادی کو نظر انداز کرتی آرہی ہیں۔
انہوں نے کہا کہ تمام سیاسی پارٹیاں وادی چناب کے مقروض ہیں لیکن اس کے دور افتادہ علاقہ کے لوگ ابھی بھی قدیم پتھر کے زمانے میں رہتے ہیں۔
انہوں نے حلقہ کے موجودہ ایم پی پر الزام لگایا کہ وہ ملک کے سب سے اعلیٰ دفتر پر بیٹھ کر صرف ادہم پور اور کٹھوعہ کے مفاد کو دیکھ رہے ہیں اور وادی چناب کو نظر انداز کیا ہے۔
انہوں نے پارٹی سے اپنے فیصلہ پر نظر ثانی کی اپیل کی ہے۔
