راجستھان میں گزشتہ کئی روز سے جاری سیاسی اتھل پتھل کے دوران آج ایک بار پھر سے کانگریس اراکین کی میٹنگ طلب کی گئی ہے جس میں ریاست کے نائب وزیراعلیٰ سچن پائلٹ کو بھی بُلایا گیا ہے۔
راجستھان میں جاری سیاسی رسہ کشی کے دوران بی جے پی نے کانگریس پارٹی کے اراکین اسمبلی کی میٹنگ پر گہری نگاہ مرکوز کررکھی ہے۔
کانگریس ارکان اسمبلی کی میٹنگ میں موجود اراکین اسمبلی کی تعداد کی بنیاد پر بی جے پی طے کرے گی کہ آگے کا لائحہ عمل کیا ہو۔ فی الحال پارٹی سے منسلک اہم رہنما آج راجستھان میں سیاسی بحران پر تبادلہ خیال کریں گے۔
وہیں دوسری جانب یہ بھی امکان ظاہر کیا جارہا ہے کہ ریاست میں جاری سیاسی بحران کے دوران بی جے پی رہنما فلور ٹسٹ کا مطالبہ کرسکتے ہیں۔
بی جے پی آئی ٹی سیل کے قومی کنوینر امت مالویہ نے ٹوئٹ کر کے اشوک گہلوت کو فلور ٹیسٹ کرانے کا مشورہ دیا ہے۔
واضح رہے کہ گزشتہ کل ہونے والی میٹنگ کے لیے کانگریس نے تمام ارکان اسمبلی کے لیے وہپ جاری کیا تھا اس کے باوجود سچن پائلٹ نے میٹنگ میں شرکت نہیں کی تھی۔ اس دوران اس طرح کی خبریں بھی گشت کر رہی ہیں کہ پائلٹ نے آج بھی میٹنگ میں شریک ہونے سے انکار کر دیا ہے۔گزشتہ روز میٹنگ کے بعد کانگریس کے قومی ترجمان رندیپ سرجے والا نے میڈیا سے کہا تھا کہ منگل کو (آج) بھی صبح 10 بجے اراکین اسمبلی کی میٹنگ طلب کی گئی ہے جس میں تمام ارکان اسمبلی کو بلایا گیا ہے اور خصوصاً سچن پائلٹ سمیت ان کے حامی اراکین سے بھی اس میٹنگ میں شریک ہونے کی اپیل کی گئی ہے۔
وہیں کانگریس کے سابق ترجمان سنجے جھا نے بڑا بیان دیتے ہوئے کہا کہ ایسا کبھی نہیں ہوا ہے کہ نائب وزیر اعلی کے خلاف ایس او جی کو نوٹس دیا گیا ہو۔ یہ سچن پائلٹ پر دباؤ بنانے کی کوشش تھی۔
انہوں نے کہا کہ کانگریس میں اندرونی جمہوریت ہے، 2018 انتخابات کی جیت سچن پائلٹ کی دی گئی ہے۔کانگریس کو سچن کی بات سننا چاہیے، مدھیہ پردیش جیسی غلطی دوبارہ نہیں ہونی چاہیے۔ہم نے سندھیا کو کھو دیا، غلطی دوبارہ نہ ہو۔
