بغیر ضرورت ہارن کا استعمال نہیں کریں: راجستھان پولیس

بغیر ضرورت کے ہارن بجانے کو لے کر جے پور پولیس لوگوں کو بیدار کر رہی ہے۔ اس سمت میں جوہری بازار علاقے میں واقع مسجد میں پروگرام کا انعقاد کیا گیا، جہاں موجود لوگوں نے بلا ضرورت ہارن نہ بجانے کے لیے حلف لیا۔

راجستھان کے دارالحکومت جے پور کے جوہری بازار علاقے میں واقع جامع مسجد میں راجستھان پولیس کی جانب سے بلاضرورت ہارن کا استعمال نہیں کرنے کو لے کر ایک پروگرام کا انعقاد کیا گیا۔

اس پروگرام میں راجستھان پولیس محکمہ کے اعلی افسران، رکن اسمبلی امین کاغذی، جامعہ مسجد انتظامیہ کمیٹی کے عہدیداران، ذمہ داران اور عوام نے کثیر تعداد میں حصہ لیا۔

وہیں اس پروگرام میں موجود عوام کو بغیر ضرورت ہارن نہیں بجانے کی حلف بھی دلائی گئی۔

پولیس محکمے کے آفیسر نے میڈیا سے بات کرتے ہوئے کہا کہ بغیر ضرورت ہارن بجانے سے کافی زیادہ نقصان ہوتا ہے، ہارن کی وجہ سے ہمیں جسمانی نقصان بھی ہوتا ہے۔

انہوں نے مزید کہا کہ مذہبی رہنماؤں کے ساتھ جگہ جگہ میٹنگ کی جائے گی جہاں ہارن سے ہونے والے نقصانات کے بارے میں لوگوں کو بتایا جائے گا۔