وزیر صحت ڈاکٹر رگھو شرما نے آل انڈیا ریڈیو کو دیے گئے ایک انٹرویو میں بتایا کہ ریاست میں کورونا متاثرین کی تعداد خواہ ہی بڑھ رہی ہے لیکن پازیٹو سے نگیٹو میں تبدیل ہونے والوں کی تعداد میں بھی تیزی سے اضافہ ہوا ہے۔
انہوں نے کہا کہ ریاست میں کورونا سے ہوئی ہلاکتوں کی شرح بھی 2.3 فیصد ہے جو کہ قومی اوسط سے بہت کم ہے اور اس وقت ریاست میں 3072 کورونا پازیٹو کیسز ہیں جن میں سے 2031 اسپتالوں میں داخل ہیں بقیہ ہوم آئیسولیشن میں ہیں۔
انہوں نے کہا کہ ریاست کے 19 اضلاع کے 26 مراکز پر کورونا کی جانچ کی جارہی ہے۔ انہوں نے کہا کہ ملک بھر میں راجستھان ریکوری کے معاملے میں سب سے آگے ہے۔
انہوں نے کہا کہ ریاست نے 38 ہزار سے زائد یومیہ ٹیسٹ کرنے کی صلاحیت بڑھائی ہے۔
ڈاکٹر شرما نے کہا کہ ریاست میں کووڈ سے نمٹنے کے لیے بہتر انتظامات کئے گئے ہیں۔ ریاست میں 405 کووڈ کیئر سنٹروں میں 42 ہزار سے زیادہ بیڈ ہیں اور آٹھ ہزار سے زائد آکسیجن سپورٹ بیڈ ، 1672 آئی سی یو بیڈ ، 881 وینٹی لیٹر ہیں۔ مناسب مقدار میں پی پی ای کٹس ، این 95 ماسک ، تھری لیر ماسک ہیں۔
انہوں نے مزید کہا کہ حکومت ہند کی جانب سے 1200 وینٹیلیٹر دستیاب کرائے جائیں گے، جس میں سے 300 وینٹیلیٹر پورٹیبل ٹائپ کے ہیں ، جو بہت مددگار ثابت ہوں گے۔
ریاست میں اب تک 7.50 لاکھ سے زیادہ ٹیسٹ کرائے جا چکے ہیں۔ ریاست نے 38250 ٹیسٹ یومیہ کرانے کی صلاحت بڑھائی ہے اور یومیہ 15 سے 16 ہزار ٹیسٹ کئے جارہے ہیں۔
انہوں نے بتایا کہ امریکہ سے آنے والی جدید ترین کوباس 8800 مشین کے بعد تقریباََ نو ہزار ٹیسٹ یومیہ کئے جاسکیں گئے، ریاست میں جانچ سہولت ملک بھر میں سب سے بہتر ہے۔ راجستھان نے پڑوسی ریاستوں کو 5000 ٹیسٹ یومیہ کرنے کی سہولت مہیا کرائی ہے ۔
