ملک گیر سطح پر جاری لاک ڈاؤن کے دوران مختلف ریاستوں سے مہاجر مزدوروں کا پیدل سفر جاری ہے اور اب تک درجنوں مزدور حادثات کے شکار ہو کر ہلاک ہو چکے ہیں۔ تاہم مہاجر مزدوروں کا پیدل سفر مسلسل جاری ہے۔
مہاراشٹر سے اترپردیش کی طرف جانے والے مزدور صنعتی شہر اندور کے بائی پاس سے ہو کر گزر رہے ہیں جن کی مدد کے لیے پاپولر فرنٹ آف انڈیا اور اندور کے رضاکاروں نے اپنا ڈیرہ بائی پاس پر ہی ڈال رکھا ہے۔ ہر جانے والے مزدوروں کو کھانا، ٹھنڈا پانی اور دیگر چھوٹی موٹی اشیاء فراہم کی جا رہی ہے، ساتھ ہی سماجی فاصلے کا بھی خاص خیال رکھا جارہا ہے۔
اس تعلق سے پاپولر فرنٹ آف انڈیا کے کفیل رضا نے بتایا کہ' پہلے ہم نے جائزہ لیا جس کے بعد ہم نے فیصلہ کیا ہے مہاجر مزدوروں کی سب سے بڑی مدد انہیں کھانا فراہم کرنا ہے۔ اس کے بعد ہم نے بائی پاس پر ایک کیمپ لگا لیا جہاں ہم مہاجر مزدوروں کو ٹھنڈا پانی، بریڈ، نمکین، دوائیاں، گلوکوز اور چھوٹی موٹی ضروری اشیا فراہم کررہے ہیں۔'
اندور کے رضاکار رشید قریشی نے بتایا کہ' ہم بائی پاس پر کھانے کے پیکٹ لے کر آ جاتے ہیں اور گزرنے والے مزدوروں کو کم سے کم دو وقت کا کھانا فراہم کراہے ہیں تاکہ کوئی بھی اس مبارک مہینے میں بھوکا نہ رہے'۔
