سانپ نے باپ اور بچوں کو ڈس لیا

ریاست تلنگانہ میں سانپ کے ڈسنے کے واقعہ میں ایک شخص کی موت ہوگئی جبکہ اس کے دوبچے کھمم ضلع کے ایک اسپتال میں زندگی کے لئے جدوجہد کر رہے ہیں۔

یہ واقعہ تلنگانہ کے ضلع محبوب نگر کے نرسمہولاپیٹ منڈل کے روپلا تانڈہ میں اُس وقت پیش آیا جب ایک مکان میں سانپ داخل ہوگیا اور تین افراد کو ڈس دیا، اس دردناک واقعہ میں ایک باپ کی موت ہوگئی اور بچوں کی حالت نازک ہے۔
تفصیلات کے مطابق روی نامی شخص اوراس کے دو بچے شرن اور نیلا تینوں کھاٹ پر سورہے تھے کہ سانپ نے انھیں ڈس دیا۔اس دردناک واقعہ کے بعد دیہات کے بزرگوں کے مشورے پر ان کو علاج کے لئے ایک جادوگر کے پاس لے جایا گیا۔ جہاں انکی طبیعت مزید بگڑ گئی۔
بعد ازاں انھیـں ایریااسپتال منتقل کیاگیا، اسپتال منتقلی کے دوران ہی روی کی موت ہوگئی۔ جبکہ بچوں کی حالت تشویشناک بتائی گئی ہے۔