ریونت ریڈی نے قومی دارالحکومت نئی دہلی میں پارلیمنٹ کے نارتھ بلاک میں سی بی آئی کے ڈائریکٹر سے اس سلسلہ میں ملاقات کی۔ انہوں نے کہا کہ کوکہ پیٹ میں سرکاری اراضیات کے ہراج کے ذریعہ ہزاروں کروڑ روپئے کا سرکاری خزانہ کو نقصان پہونچایا جارہا ہے، اس کی مکمل اور جامع جانچ کی ضرورت ہے۔
انہوں نے بعد ازاں میڈیا سے بات کرتے ہوئے کہاکہ ان سرکاری اراضیات کے ہراج کے ذریعہ 2500کروڑروپئے ہی حکومت حاصل کرنے کا دعوی کررہی ہے۔انہوں نے کہاکہ ہراج کے نام پر قریبی افراد کو یہ اراضیات دی جارہی ہیں۔اس طرح ریاست کے خزانہ کو وصول ہونے والے 1500کروڑروپئے کا نقصان ہورہا ہے۔ اس معاملہ کی شکایت مختلف محکمہ جات سے کرنے کا کانگریس نے فیصلہ کیا ہے۔
یہ بھی پڑھیں:حیدرآباد: ٹینک بنڈ پر ہر اتوار کو ٹریفک پابندی
اسی کے حصہ کے طورپر سی بی آئی کے ڈائرکٹر سے ملاقات کرتے ہوئے اس خصوص میں نمائندگی کی گئی۔کانگریس کے کارگذار صدور، ارکان پارلیمنٹ،کمیٹی کے صدورنشین سے ملاقات کی دو دن پہلے اجازت مانگی گئی تھی تاہم کوویڈ کی وجہ سے کانگریس سے صرف ایک ہی فرد کو ملاقات کی اجازت دی گئی جس پر داخلی طورپر پارٹی میں تبادلہ خیال کے بعد ان کو یہ ذمہ داری دی گئی اور انہوں نے تحریری طورپر سی بی آئی کے ڈائرکٹر سے اس خصوص میں نمائندگی کی۔
یو این آئی
