مفتی محمد زبیرقاسمی جنرل سکریٹری جمعیۃ العلماء تلنگانہ و آندھراپردیش کی اطلاع کے مطابق جمعیۃ العلماء ہند کے صدر مولانا سید ارشد مدنی صاحب دامت برکاتہم کی ہدایت پر جمعیۃ العلماء تلنگانہ وآندھراپردیش نے لاک ڈاؤن کے پہلے ہی دن سے مسلم وغیرمسلم متاثرین بالخصوص غریب طبقہ کی امداد و راحت رسانی کے لئے کوشاں اور فکر مند ہے، متاثرہ افراد کی قانونی امداد مختلف علاقوں میں پھنسے ہوئے لوگوں کو ان کی منزلوں تک پہونچنے میں مدد، کورنٹین اورآئسولیشین میں رکھے گئےافراد کے لئے سہولت اور اس خصوص میں حکومت کے ذمہ داروں کے ساتھ رابطے کا کام جمعیۃ العلماء مستقل کررہی ہے۔
اس ضمن میں ریاستی صدر مولانامفتی غیاث الدین رحمانی قاسمی نے تمام اضلاع کو متوجہ کیا اور ہر ضلع بشمول حیدرآباد، نظام آباد، کریم نگر، منچیریال،ظہیرآباد، مکتھل،کاماریڈی،کھمم ، پامور،پرکاشم،راجمنڈری، تنالی،کرنول،کدری،اونگول،عادل آباد،نرمل،رنگاریڈی وغیرہ تمام اضلاع میں جمعیت کی طرف سے (6235) غذائی اجناس اور چاول کے کٹس اور پکے ہوئے کھانے کے (7780) پیکٹس اور نقد رقم کی شکل میں تقریبا تین لاکھ کی امداد کی گئی۔
جمعیت علماء نے اس سلسلے میں اپنے تمام ضلعوں اور شہر حیدرآباد کے ذمہ داروں سے موقع بموقع اس بات کی بھی خواہش کی ہے کہ وہ تمام حفاظتی تدابیر کے ساتھ رفاہی خدمات انجام دیں، اس خصوص میں محکمہ پولیس اور محکمہ ریونیو کی طرف سے جمعیۃ العلماء کو تعاون حاصل رہا۔
