تاریخی عمارتوں کے تحفظ کی مہم

حیدرآباد شہر تاریخی عمارتوں کا مجموعہ کہلاتا ہے، اس شہر  میں کئی خوبصورت و دلکش تعمیرات موجود ہیں، جو قطب شاہی اور آصف جاہی سلاطین کی تعمیر کردہ ہیں، مگر اب ان میں سوائے چند عمارتوں کے اکثر و بیشتر خستہ حالی اور سرکاری محکمہ جات کی لاپرواہی کا شکار ہیں۔

ایسے میں تاریخی عمارتوں کا تحفظ کرنے والی تنظیم حیدرآباد ہیریٹج ٹرسٹ نے تاریخی عمارتوں کی صفائی کا بیڑہ اٹھایا ہے، اس سلسلہ میں پہلے پروجیکٹ کے طور پر ہل فورٹ پیلیس کا انتخاب کرتے ہوئے صفائی کا کام شروع کیا گیا ہے۔

ہیریٹج ٹرسٹ کے ذمہ داران نے اس105 سالہ قدیم عمارت کی تاریخ بیان کرتے ہوئے بتایا کہ یہ عمارت چیف جسٹس نظامت جنگ کی رہائش گاہ تھی، جو نظام ششم کے دور میں چیف جسٹس کے عہدے پر فائز تھے، اس کے بعد یہ آصف جاہ سابع کے فرزند معظم جاہ کی ملکیت رہی،بعد ازیں حیدرآباد کے بھارت میں انضمام کے بعد یہ جائداد محکمہ سیاحت کی ملکیت بنی۔ حکومت نے اسے کچھ عرصے تک کرائے پر رکھا تاہم گزشتہ 40 برس سے یہ عمارت خالی ہے جو ایک ڈھانچے میں تبدیل ہوگئی ہے، اب حیدرآباد ہیریٹج ٹرسٹ نے اس کے تحفظ کیلئے مہم شروع کی ہے جس کے تحت صفائی کا یہ پہلا قدم ہے۔