تلنگانہ پردیش کانگریس کمیٹی کے صدر اور نلگنڈہ کے رکن پارلیمان این اتم کمار ریڈی نے وزیر اعلی کے چندر شیکھر راؤ سے درخواست کی کہ حکومت کیرالا کے طرز پر ایک سرکاری حکمنامہ جاری کرتے ہوئے تلنگانہ میں بھی قومی آبادی رجسٹر (این پی آر) سے متعلق تمام سرگرمیوں پر روک لگائیں۔
اتم کمار ریڈی نے وزیراعلی کے نام ایک کھلے مکتوب میں مزید کہا کہ 'این پی آر، این آر سی اور سی اے اے کے خلاف تلنگانہ اسمبلی میں قرارداد کی منظوری کا ہم خیرمقدم کرتے ہیں لیکن این پی آر کے کام کو روکنے کیلئے صرف یہی کافی نہیں ہوگا۔'
ریاستی عہدیداروں میں الجھن کو دور کرنے کیلئے ایک سرکاری حکمنامہ جاری کرنا چاہئے جس طرح دیگر ریاستوں میں کیا گیا ہے۔ اتم کمار ریڈی نے اس مکتوب میں حکومت کیرالا کی طرف سے جاری کردہ حکمنامے کی ایک نقل بھی مکتوب کے ساتھ بھیجی ہے۔
واضح رہے تلنگانہ کے وزیر اعلی کے چندرشیکھر راو نے بجٹ سیشن میں اعلان کیا ہیکہ سیشن کے دوران سی اےاے،این پی آر اور این آر سی پر مدلل بحث کی جائے گی اور اس کے خلاف قرارداد بھی منظور ہوگی۔
