حیدرآباد میں مساجد کو سینیٹائز کرنے کی مہم

چار مقامی نوجوان اپنے خرچ پر پورے شہر کی مساجد کو سینیٹائز کر رہے ہیں، یہ نوجوان دن میں اپنی ذمہ داری نبھاتے ہیں اور رات میں مساجد میں سینیٹائزر کا چھڑکاؤ کر تے ہیں۔

ان لاک ڈاؤن ون کے تحت حیدرآباد میں 8 جون سے مساجد کے دروازے کھول دئے گئے ہیں۔ ایسے میں حیدرآباد کے 4 نوجوانوں نے حیدرآباد کے مختلف علاقوں کی مساجد میں سنیٹائزر کے چھڑکاؤ کی مہم کی شروعات کی ہے۔ یہ نوجوان رات میں گشت کرتے ہوئے مختلف مساجد سینیٹائز کرتے ہیں جبکہ دن میں یہ نوجوان اپنی دیگر ذمہ داریوں کو پورا کرتے ہیں۔

نوجوانوں کی اس ٹیم نے اب تک 200 سے زائد مساجد میں سنیٹائزر کا چھڑکاؤ کیا ہے۔ ٹیم کا حصہ سید علی احمد نے کہا کہ شہر کی ابھی مختلف مساجد میں سنیٹائزر چھڑکاؤ کرنا باقی ہے جسے ہم پورا کر رہے ہیں۔ انہوں نے کہا کہ اس کے لئے جو بھی اخراجات ہوتے ہہیں ہم چار ساتھی اپنے خرچ سے یہ کام انجام دے رہے ہیں اور آگے بھی کریں گے، اس کے لئے کوئی چندہ جمع نہیں کیا گیاہے۔

مسجد میں سینیٹائزر کا چھڑکاؤ

ایک مسجد کو سینیٹائز کرنے میں کم از کم 6 ہزار روپئے کا خرچ ہوتا ہے۔ آج ٹولی چوکی علاقہ کی 10 مساجد کو سینیٹائز کیا گیا ہے۔
ان نوجوانوں کے جذبے کو دیکھ کر امید کی جا سکتی ہے کچھ اور نوجوان سامنے آئیں اور اس کام کو انجام دیں تاکہ شہر کی تمام مسجدوں کو موقع موقع پر سینیٹائز کیا جا سکے اور نمازی کورونا وبا سے محفوظ رہ سکیں۔