آسام کی حکومت نے جمعہ کے روز ریاست میں کووڈ۔19 وبا کے عروج کے دوران پیٹرول، ڈیزل اور شراب پر اضافی سیس واپس لینے کا اعلان کیا ہے۔
وزیر خزانہ ڈاکٹر ہمنت بشوا شرما نے ریاستی قانون ساز اسمبلی میں کہا ’’اب وبا بڑی حد تک کم ہوچکی ہے، مریضوں کی تعداد بھی کم ہوگئی ہے اور کووڈ۔19 کی اسکریننگ کی ضرورت ہے۔ ایسے حالات میں ریاستی کابینہ نے کووڈ کے دور میں لگائے گئے اضافی سیس اور ٹیکس واپس لینے کا فیصلہ کیا ہے۔
انہوں نے کہا کہ پٹرول اور ڈیزل پر لگائے گئے اضافی سیس کو ہٹا دیا گیا ہے اور آج آدھی رات سے یہ 5 روپے فی لیٹر سستا ہوجائے گا۔ اسی طرح گزشتہ سال کے دوران مختلف اقسام کی شراب پر لگائے گئے لگ بھگ 25 فیصد اضافی سیس بھی واپس لے لیے گئے ہیں۔
ڈاکٹر شرما نے کہا کہ کووڈ۔19 کی وبا نے ریاست کے سامنے غیر معمولی چیلنجز پیش کیا، جس کی وجہ سے وسائل پر دباؤ پڑا ہے۔ انہوں نے چیلنجز کا سامنا کرنے کے لیے سرکار کے ساتھ کھڑے رہے کورونا وائریئرز کے ساتھ ساتھ عام لوگوں کا بھی شکریہ ادا کیا۔
انہوں نے کہا کہ مرکزی حکومت اور عام ایجنسیوں سے ملنے والی گرانٹ کے ساتھ ہی عام لوگوں کو بھی اس وبا کے خلاف ریاست کی لڑائی میں بہت تعاون ملا۔
ڈاکٹر شرما نے مالی سال 2021-22 کی پہلی ششماہی کے لیے 60،784.03 کروڑ روپے کا ووٹ آن کاؤنٹ پیش کیا۔
یو این آئی
