گیا: بہار کے گیا شہر میں ہفتہ کی سہ پہر کو پولیس کی گاڑی سے نیپال کا ایک شہری زخمی ہو گیا۔ زخمی شخص کو علاج کے لیے جے پرکاش نارائن ہسپتال میں بھرتی کرایا گیا ہے جہاں پر اس کی حالت بہتر بتائی جارہی ہے۔
یہ حادثہ اس وقت پیش آیا جب پولیس ڈرائیور جیپ لیکر شہر کے اے پی آر کاشی ناتھ موڑ سے گزر رہا تھا، تبھی ڈرائیور نے توازن کھو دیا جس کی وجہ سے گاڑی بجلی کے پول میں جاکر ٹکرائی اور حادثے کا شکار ہوگئی۔
زخمی بابا کے مطابق وہ نیپال کا رہنے والا ہے اور یہاں وشنو پتھ مندر میں پوجا کے لیے آیا تھا۔ حادثے کی جگہ پر موجود ایک نوجوان اجیت نے پولیس ڈرائیور کی غلطی بتاتے ہوئے کہا کہ ایسا محسوس ہوتا ہے کہ ڈرائیور نشے کی حالت میں تھا کیونکہ وہ نہ تو وردی میں تھا اور نہ ہی سول ڈریس میں بلکہ وہ ہاف بنیان اور ہاف پینٹ پہنے ہوئے تھا۔ اس دوران وہاں موجود لوگوں نے پولیس ڈرائیور کے ساتھ مارپیٹ بھی کی لیکن پولیس کے پہنچنے کے بعد معاملہ ختم ہو گیا۔
مزید پڑھیں: "سب کا ساتھ سب کا وکاس" کیلئے ذات پر مبنی مردم شماری ضروری ہے: اختر الایمان
اس سلسلے میں سیٹی ایس پی راکیش کمار نے کہا کہ جانکاری ملنے کے بعد پولیس موقع پر پہنچ کر ڈرائیور کو تھانہ لے گئی ہے اور زخمی شخص کو ہسپتال پہنچایا۔ پولیس نے کہا کہ پورے معاملے کی تحقیقات کی جائے گی۔
