ضلع گیا کے آمس تھانہ حدود کے بشنپور جی ٹی روڈ پر تیز رفتار ایک ٹرک نے دو آٹو ٹیمپو کو زوردار ٹکر مار دیا۔ جس میں پندرہ افراد شدید طور سے زخمی ہوگئے ہیں جبکہ چھ افراد کی دردناک موت ہوگئی ہے۔ اطلاع کے مطابق سبھی تلک کی رسم کی ادائیگی کے بعد واپس اپنے گھر جارہے تھے، تبھی یہ حادثہ پیش آیا ہے۔
زخمیوں کوعلاج کے لئے مقامی ہسپتال میں داخل کرایا گیا ہے ۔ شدید طور سے کچھ زخمیوں کو بہتر علاج کے لئے انوگرہ نارائن ہسپتال ریفر کیا گیا ہے۔ واقعہ صبح آٹھ بجے کے قریب پیش آیا ہے ۔بتایا جا رہا ہے کہ سبھی افراد ٹیمپو سے تلک کی رسم ادا کرکے بالوگنج گاؤں سے اپنے گاؤں آمس کے ریگنیا واپس آرہے تھے تبھی یہ حادثہ بشنپور کے پاس پیش آیا ہے۔
موقع پر موجود مقامی افراد کے مطابق ٹرک رفتار میں چل رہی تھی، اچانک ٹرک اور آٹو میں تصادم ہو گیا۔اتنے زبردست طریقے سے تصادم ہوا کہ آٹو کافی دور تک پلٹتے ہوئے چلا گیا۔ دونوں آٹو پوری طرح سے تباہ ہو گئے ہیں۔ موقع سے ٹرک کا ڈرائیور فرار ہوگیا ۔پولیس نے نعش کو لیکر پوسٹ مارٹم کے لئے انوگرہ نارائن مگدھ میڈیکل کالج و ہسپتال گیا بھیجا ہے۔
