گیا میں ایک ساتھ 32 رپورٹ مثبت آنے کے بعد ڈر کا ماحول قائم ہو گیا ہے ۔ ڈر اسلیے بھی بڑھا ہے کیونکہ محکمہ ہیلتھ کی طرف سے رینڈم چیکنگ میں پوزیٹیو معاملے آرہے ہیں۔ سول سرجن ڈاکٹر برجیش کمار سنگھ نے بتایا کہ پٹنہ سے آر ٹی پی سی آر کی رپورٹ میں 18 افراد کورونا متاثر پائے گئے ہیں، جبکہ مگدھ میڈیکل ہسپتال سے ٹرونیٹ مشین کی تحقیقاتی رپورٹ میں 14 افراد مثبت پائے گئے ہیں۔
اس میں بگ بازار کے پانچ ملازمین کی مثبت رپورٹ ہے۔ ان سب کی رپورٹ کی تصدیق کے لیے نمونہ پٹنہ بھیجا گیا ہے۔ وہاں سے اطلاعات آنے کے بعد ہی واضح ہوسکے گا کہ وہ واقعتا کورونا سے متاثر ہیں یا نہیں۔ انہوں نے بتایا کہ آر ٹی پی سی آر کی رپورٹ کے مطابق امام گنج بلاک سے چھ افراد ، بانکے بازار سے پانچ ، بودھ گیا سے ایک ، کونچ سے ایک ، وزیر گنج سے ایک ، پولیس لائن گیا سے دو اور گیا ٹاؤن سے دو افراد کو کورونا مثبت پایا گیا ہے۔ جبکہ ٹرونیٹ مشین کی رپورٹ میں بگ بازار کے پانچ اہلکاروں کے علاوہ بی ایم پی کے چار جوان اور ایس بی آئی بینک کے ایک گارڈ کی ٹیسٹ رپورٹ مثبت آئی ہے
سول سرجن نے بتایا کہ اب تک ضلع میں کورونا سے متاثرہ افراد کی تعداد 162 ہو گئی ہے۔ ان میں سے 118 صحت مند ہونے کے بعد اپنے گھر واپس جاچکے ہیں۔ ساتھ ہی انہوں نے تمام باشندوں سے اپیل کی کہ وہ کورونا کے خطرات کے پیش نظر جسمانی فاصلے پر عمل کریں۔ ماسک لازمی طور سے پہنیں اور ہاتھوں کو صابن سے اچھی طرح سے دھوئیں۔
