وزیر اعظم نریندر مودی نے کورونا وائرس کی عالمی وبا کی وجہ سے 25 مارچ سے جاری ملک گیر لاک ڈاؤن کو 17 مئی سے آگے بڑھانے کا اعلان کرتے ہوئے آج کہا کہ چوتھے مرحلے میں نئے قوانین نافذ ہوں گے اور ماسک لگا کر اور دو گز کے فاصلہ پر عمل کرتے ہوئے ملک کی عوام اپنے مقاصد کو حاصل کرنے کے لیے آگے بڑھیں گے۔
مسٹر مودی نے قوم کے نام پیغام میں کہا’’لاک ڈاؤن کا چوتھا مرحلہ، ’لاک ڈاؤن 4.0‘ مکمل طور پر نئے رنگ و روپ اور نئے قوانین والا ہوگا۔ ریاستوں سے ہمیں جو تجاویز مل رہی ہیں، ان کی بنیاد پر لاک ڈاؤن 4.0 سے منسلک معلومات بھی آپ کو 18 مئی سے پہلے دے دی جائے گی‘‘۔
انہوں نے کہا کہ کورونا وائرس طویل عرصہ تک زندگی کا حصہ رہنے والا ہے لیکن ایسا نہیں ہے کہ ہماری زندگی کورونا وائرس کے ارد گرد ہی سمٹ کر رہ جائے۔ ہم ماسک پہنیں گے اور دو گز کے فاصلہ کی پیروی کریں گے لیکن اپنے اہداف کو دور نہیں ہونے دیں گے، انہیں حاصل کرنے کے لیے آگے بڑھیں گے۔
