قومی دارالحکومت دہلی کے شاہین باغ علاقے میں مسلسل کئی ہفتوں سے شہریت ترمیمی قانون و این آرسی کی مخالفت میں پرامن احتجاجی مظاہروں اور دھرنوں کا سلسلہ جاری ہے۔
شاہین باغ میں لوگ اس قانون کی مخالفت میں کئی ہفتوں سے دھرنے پر بیٹھے ہیں، ان کے یہ بلند ہمت و حوصلے اس ٹھٹرتی ٹھنڈ میں بھی ماند نہیں پڑے ہیں، بلکہ روز بروز ان کی اس تعداد میں اضافہ ہی ہورہا ہے۔
اطلاع کے مطابق اس احتجاجی مظاہروں سے خطاب کرنے اور ان کے بلند ہمت و حوصلے کو تازہ دم رکھنے ان کے بیچ سوامی اگنی ویش بھی پہنچے۔
سوامی اگنیویش نے مظاہرے سے خطاب میں کہا کہ 'یہاں بیٹھے لوگوں کو مجھے اس کپڑے میں دیکھ کر شاید ایسا لگ رہا ہو کہ میں مسلمانوں کا مخالف ہوں، لیکن میں آپ کو بتا نا چاہتا ہوں کہ میرے سبھی اچھے دوست مسلمان ہیں، جن کے ساتھ مل کر میں کام کرتا ہوں۔
انہوں نے مزید اپنے خطاب میں کہا کہ سب سے بڑا مذہب انسانیت ہے اور آج جو لکیریں کھینچی جا رہی ہیں ہماری آپسی اخوت بھائی چارہ کو توڑنے کی جو ناپاک سازشیں رچی جا رہی ہیں، ہمیں ان تمام سازشوں کا ایک جٹ ہوکر مقابلہ کرنا ہوگا۔
مزید پڑھیں: 'فیض کی نظم پر اعتراض مضحکہ خیز'
واضح رہے کہ شاہین باغ میں شہریت ترمیمی قانوں و این آرسی کی مخالفت میں جاری دھرنے کی وجہ سے دلی سے نوئیڈا کی طرف جانے والی سڑک کو کالندی کنج کے پاس بند کر دیا گیا ہے، جس کے سبب کافی جام بھی لگا رہتا ہے۔
