رضا اکیڈمی جلد ہی وسیم رضوی کے خلاف عرضی داخل کرے گا

رضا اکیڈمی کی جانب سے دارالحکومت دہلی کے انڈیا اسلامک کلچرل سینٹر میں آج تحفظ ناموس رسالت کانفرنس کا انعقاد کیا گیا۔

رضا اکیڈمی کے سربراہ محمد سعید نوری نے ای ٹی وی بھارت سے خصوصی گفتگو میں کہا کہ' کانفرنس میں ملک بھر کے علماء نے شرکت کی ہے۔ اس کانفرنس کا مقصد حضرت محمد مصطفیٰ صلی اللہ علیہ وسلم کے خلاف زہرافشانی کرنے والوں پر کارروائی کرنے کے لیے حکمت عملی تیار کرنا ہے'۔

محمد سعید نوری نے بتایا کہ' گذشتہ کچھ عرصہ سے رسول اکرم صلی اللہ علیہ وسلم کی شان میں گستاخی کرنے والوں کے خلاف احتجاجی مظاہرے تو کیے جاتے رہے ہیں لیکن قانونی کارروائی نہیں کی جاتی ہے تاہم اب ہم نے یہ طے کیا ہے کہ ہم قانونی کارروائی بھی کریں گے۔انہوں نے وسیم رضوی کے بیان کی شدید الفاظ میں مذمت کرتے ہوئے کہا کہ' رضا اکادمی کی جانب سے گذشتہ روز ہی قانونی قدم اٹھانے کی کارروائی شروع کی جا چکی ہے اور جلد ہی سپریم کورٹ میں وسیم رضوی کے خلاف عرضی داخل کی جائے گی'۔انہوں نے مزید کہا کہ' وسیم رضوی قرآن سے 26 آیات کو نکالنے کی بات کر رہا ہے جبکہ ہم ایک نقطہ کو نکالنے کی بات بھی برداشت نہیں کر سکتے۔ انہوں نے کہا کہ' ہمیں امید ہے کہ سپریم کورٹ بھی جلد ہی وسیم رضوی کی عرضی کو خارج کر دے گا۔'