یورپی ممالک میں کووڈ 19 کی دوبارہ دستک کے پیش نظر وبائی مرض سے باشندوں کو تحفظ فراہم کرنے کے لئے ریاست اترپردیش کی حکومت نے عوام سے رہنما اصولوں کی پاسداری عمل میں لانے کے لیے مختلف ذرائع سے وسیع پیمانے پر آگہی پروگرام کا سلسلہ شروع کیا ہے۔
تشہیری و آگہی مہم کے تحت ضلع گوتم بدھ نگر میں بلاک دادری کی پنچایت دوجانہ میں منادی کے ذریعہ پورے گاؤں میں وسیع تشہیر کو یقینی بنایا جا رہا ہے۔
اس سلسلے میں چیف ڈیولپمنٹ آفیسر انیل کمار سنگھ نے مطلع کیا ہے کہ پنچایت راج محکمہ کے توسط سے ضلع کے تمام دیہی علاقوں میں یہ پروگرام باقاعدگی سے جاری ہے اور باشندوں کو آگاہ کرنے کے لئے یہ کارروائی کی جا رہی ہے تاکہ علاقوں کے تمام شہریوں کو کورونا وائرس کے انفیکشن اور وبائی امراض سے بچایا جا سکے۔
واضح رہے کہ انگلینڈ سے سینکڑوں کی تعداد میں لوگوں کی نوئیڈا آمد ہوئی ہے جن میں سے بہت سے لوگوں کی آر ٹی پی سی آر ٹیسٹنگ کرائی گئی تاہم اب بھی درجنوں کو محکمہ صحت کی ٹیم تلاش کر رہی ہے۔ کیونکہ بعض لوگوں نے اسکریننگ سے بچنے کی خاطر غلط پتہ اندارج کرایا ہے۔
