ملک میں کووڈ 19 کے خدشے کے پیش نظر لاک ڈاؤن کا اعلان کیا گیا ہے لیکن اس درمیان کانگریس کے سینئر رہنما اجئے ماکن نے ایک ویڈیو ٹویٹ کر وزیر اعظم نرندر مودی پر سخت تنقید کی ہے۔
کانگریس رہنما نے ایک ویڈیو ٹویٹ کرتے ہوئے لکھا ہے کہ رین بسیرا میں ہزاروں لوگ کھانے کے انتظار میں جمع ہیں۔ انہوں نے وزیر اعظم پر تنقید کرتے ہوئے لکھا ہے کہ نوٹ بندی بنا تیاری کے، جی ایس ٹی بنا تیاری کے، ویسے ہی لاک ڈاؤن بنا کسی تیاری کے کیا گیا ہے، صرف بھاشن سے کام چلاؤ۔ اجے ماکن نے آگے لکھا کہ بھکت جن معاف کریں، آج ہم بول رہے ہیں ، کل آپ بھی بولیں گے۔
دراصل ویڈیو میں دہلی کےایک رین بسیرا کےقریب غریبوں کی بھیڑ کو دکھایا گیا ہے، جس میں بڑی تعداد میں غریب ایک جگہ کھانےکے انتظار میں بیٹھے ہیں۔
واضح ہو کہ کل وزیر اعظم نرندر مودی نے پورے ملک میں لاک ڈاؤن کا اعلان کیا تھا اور لوگوں سے اس پر عمل کرنے کی اپیل کرتےہوئے کہا تھا کہ گھر کے باہر لکشمن ریکھا کھینچ دیں اور اس کے باہر نہ جائیں۔
وزیر اعظم نے ملک کےنام اپنے خطاب میں کہا تھا کہ کھانے کی اشیاء کی کسی قسم کی کمی نہیں ہوگی لیکن آج دہلی کے ایک رین بسیرا کے قریب جیسے ہی غریبوں کو کھانے کا پتہ چلہ ان کی بھیڑ جمع ہو گئی، جس کے بعد کانگریس رہنما کو وزیر اعظم نرندر مودی پر تنقید کرنے کا موقع مل گیا۔
