قومی دارالحکومت دہلی میں کورونا وائرس کے بڑھتے معاملات کے پیش نظر وزیر اعلیٰ اروند کیجریوال نے ڈیجیٹل پریس کانفرنس میں کل جماعتی اجلاس سے خطاب کیا۔
کل جماعتی اجلاس کے تعلق سے وزیراعلیٰ اروند کیجریوال نے کہا کہ کل جماعتی اجلاس میں سیر حاصل گفتگو ہوئی، سبھوں نے اپنی اپنی رائیں رکھی ان پربلاشبہ عمل ہوگا۔
انہوں نے مزید کہاکہ' ہم نے سب کو بتایا کہ یہ مشکل وقت ہے، یہ وقت سیاست کرنے کا نہیں ہے۔ہمیں کچھ دن سیاست اور بیان بازی کو ایک طرف رکھنا چاہئے۔ کیونکہ آنے والی نسلیں ہمیں اس بات سے یاد رکھیں گی کہ جب دہلی ایک مشکل وقت سے گزر رہا تھا، ایسے میں ہم نے ان کی کس طرح کی خدمت کی۔ نہ کہ ہم نے کیسے سیاست کی'۔
انہوں نے بتایا کہ' تمام جماعتوں کے نمائندوں نے اس پر اتفاق کیا ہے۔ مزید چھٹھ پوجا کے عوامی تقریب پر پابندی کے تعلق سے وزیر اعلی نے کہا کہ' ہم سب چھٹھ پوجا کررہے ہیں، ہمیں اس پوجا کی اہمیت سے ہر گز انکار نہیں ہے، لیکن اجتماعی طور پر لوگوں کا پانی میں کھڑا ہونا خطرناک ہوسکتا ہے'۔
دہلی کے عوام سے خطاب کرتے ہوئے وزیر اعلی کیجریوال نے کہا کہ' آپ مجھے بیٹا سمجھتے ہیں، اس تعلق سے میں آپ سب سے کہنا چاہاتا ہوں میرے 2 کروڑ کنبے کے لوگ ایک ساتھ مل کر چھٹھ پوجا منائیں۔ لیکن سوچئے کہ، اگر 200 افراد پر مشتمل ایک تالاب میں اگر کوئی شخص کورونا سے متاثر ہو اور اس کے ذریعے تمام لوگ اس وبا کی گرفت میں آجائیں تو کیا یہ بہتر ہوگا۔انہوں نے اس بابت ماہرین کے حوالے سے بتایا کہ' یہ بات یقینی ہے کہ اگر ایسا ہوتا ہے تو کورونا بڑے پیمانے پر پھیل جائے گا'۔
وزیر اعلی نے اس دوران گجرات، ممبئی، پنچکولا کا بھی ذکر کیا اور کہا کہ چھٹھ پوجا منانا منع نہیں ہے، بلکہ اس بار اسے گھر پر ہی منانا ہے۔
دہلی میں کورونا بیڈ کی دستیابی کے بارے میں ، اروند کیجریوال نے کہا کہ اس وقت دہلی میں 7 ہزار 461 بیڈ دستیاب ہیں اور قریب 446 آئی سی یو بھی ہیں۔انہوں نے کہا کہ گذشتہ ہفتے عدالت نے کورونا کے 33 ہسپتالوں کے لئے 80 فیصد آئی سی یو بیڈز محفوظ رکھنے کا حکم دیا تھا آج سے اس پر عمل درآمد ہو رہا ہے، اس سے 400 کے قریب آئی سی یو بیڈ میں اضافہ ہوگا۔ نیز، کوڈ آئی سی یو کی تعداد بھی 50 فیصد تھی جو اب کم کی جارہی ہے۔
