قومی دارالحکومت دہلی میں ٹیکہ کاری کو فروغ دینے کے لیے حکومت کے ساتھ ساتھ نجی کمپنیاں بھی متعدد اقدامات کر رہی ہیں اور لوگوں کو ویکسین لینے کے لیے متعدد طریقوں سے بیدار بھی کیا جارہا ہے۔
وہیں اب دہلی میں لوگوں کو ویکسین لینے کی جانب راغب کرنے کے لیے بریانی میں 20 فیصد کی رعایت دی جارہی ہے۔ شمال مشرقی دہلی کے شاستری پارک علاقے میں اکرم بریانی کا کاروبار کرتے ہیں، جس کے لیے انہوں نے اپنی دکان پر ایک پوسٹر چسپاں کر رکھا ہے جس پر لکھا ہے کہ ویکسین لینے والے شخص کو 20 فیصد ڈسکاؤنٹ کے ساتھ بریانی دی جائے گی۔
اکرم کی دکان پر اگر کوئی شخص اپنے ساتھ ویکسینیشن کا سرٹیفکیٹ لے کر آتا ہے تو اسے بریانی کی قیمت میں 20 روپے کی چھوٹ دی جا رہی ہے۔ جب کہ اگر سول ڈیفنس کے رضاکار ایک دن میں 30 افراد کو ویکسینیشن لگانے میں کامیاب ہو جاتے ہیں تو انہیں مفت میں بریانی کھلائی جا رہی ہے۔
بریانی دکان کے مالک اکرم نے بتایا کہ جب وہ ویکسین لینے کے لیے گئے تھے تو اس وقت سینٹرز پر ویکسین لینے والوں کی تعداد کافی کم تھی، جس کی وجہ سے انہوں نے سوچا کہ کیوں نہ اپنی بریانی کے ذریعے ہی عوام کے درمیان بیداری پیدا کی جائے۔ اس اعلان کے بعد متعدد افراد ویکسین لگوا کر اکرم بھائی کی بریانی کھانے آتے ہیں اور رعایت سے مستفید ہوتے ہیں۔
