عملہ، شکایت اور پنشن امور کی مرکزی وزارت نے بدھ کو ایک ہدایت جاری کرکے کہا کہ کورونا وائرس کے انفیکشن کا سائکل توڑنے کے لئے اس کے دفاتر میں کام کرنے والے تمام حکام اور ملازمین، جن میں عارضی ملازمین بھی شامل ہیں، کو آروگیہ سیتو ایپ فوری طور پر اپنے فون میں ڈاون لوڈ کرنی ہوگی۔
حکومت کا کہنا ہے کہ یہ قدم تمام ملازمین کی حفاظت کو مد نظر رکھ کر اٹھایا گیا ہے۔
حکمنامے میں کہا گیا ہے کہ تمام ملازمین کو گھر سے دفتر کے لئے نکلنے سے پہلے آروگیہ سیتو ایپ میں اپنا اسٹیٹس دیکھنا ہوگا۔ اگر ’اسٹیٹس‘ میں انہیں ’محفوظ‘ یا ’کم خطرہ‘ نظر آتا ہے تو ہی انہیں دفتر آنا ہے۔
ملازمین کو صلاح دی گئی ہے کہ اگر ایپ میں ان کے اسٹیٹس میں ’تھوڑا‘ یا ’زیادہ خطرہ‘ نظر آتا ہے تو انہیں دفتر نہیں آنا ہے اور خود کو 14دن یا ایپ کے اسٹیٹس میں پھر سے ’محفوظ‘ یا ’کم خطرہ‘ نظر آنے تک خود کو الگ تھلک رکھنا ہے۔
ہدایت میں وزارت اور محکموں میں جوائنٹ سیکریٹری (انتظامیہ) کو اس حکمنامے پر عملا آوری کو یقینی بنانے کا پابند بنایا گیا ہے۔ وزارت اور محکمہ ان سے متعلقہ اداروں اور تنظیموں میں بھی اس طرح کی ہدایت جاری کرسکتے ہیں۔
حکومت نے اعلی حکام سے اس ہدایت پر عمل سے متعلق رپورٹ بھی طلب کی ہے۔
