ایئر انڈیا کے ایک ترجمان نے اس بات کی تصدیق کی کہ پرواز نمبر اے آئی 191 کو جمعرات کو احتیاطی طور پر لندن کے اسٹینڈ اسٹیڈ ہوائی اڈے پر اتارا گیا کیوں کہ اس میں بم ہونے کی اطلاع ملی تھی۔ حالانکہ ترجمان نے فی الحال مزید کوئی اطلاع دینے سے انکار کر دیا۔
دوسری طرف اسٹینڈ اسٹیڈ ہوائی اڈے نے ٹوئٹ کرکے بتایا کہ ایئر انڈیاکا بوئنگ 777 مقامی وقت کے مطابق 10.15 بجے (ہندوستانی وقت کے مطابق دوپہر تقریبا َ دو بجکر 45منٹ) کے قریب ہوائی اڈے پر حفاظت کے ساتھ اتار لیا گیا۔ ایسکس پولیس ہوائی اڈے پر پوری طرح مستعد تھی۔ طیارہ کو رن وے سے دور ایک جگہ لے جایا گیا۔
ایئرانڈیا کے طیارہ کی پور ی جانچ کی جارہی ہے جب کہ اسٹینڈ اسٹیڈ ہوائی اڈے کے رن وے پر طیاروں کی آمدورفت معمول کے مطابق جاری ہے۔
