اردو اکادمی دہلی کا ادبی و ثقافتی ماہنامہ رسالہ ایوانِ اردو گزشتہ 33 برس سے متواتر اردو ادب و تنقید اور تاریخ و ثقافت کی اہم خدمات انجام دے رہا ہے۔
اکادمی کے لیے خوشی کا مقام ہے کہ یو جی سی (University Grants Commission) کی تازہ ترین فہرست میں ایوانِ اردو کو اس کی 33 سالہ علمی و ادبی خدمات اور اس کی اہمیت کے پیشِ نظر اپنے منظور شدہ رسائل کی فہرست میں پھر سے شامل کیا ہے۔
اردو اکادمی دہلی کے وائس چیئرمین پروفیسر شہپر رسول اور دیگر اراکین نے یو جی سی کے اس اقدام کی ستائش کی ہے۔
واضح رہے کہ ایوانِ اردو میں جہاں ملک اور بیرونِ ملک کی مختلف یونیورسٹیز کے باوقار اساتذہ اور اردو کے دیگر نامور ادباء و شعراء کے گراں قدر مضامین اور تخلیقات شائع کی جاتی ہیں، وہیں اس رسالے میں ریسرچ اسکالرز کو بھی لکھنے کا موقع دیا جاتا ہے، جس سے نہ صرف ان کی حوصلہ افزائی ہوتی ہے بلکہ ایوانِ اردو میں شائع ہونے والے ان کے مضامین اور تخلیقات کی بنیاد پر ان کی شناخت بھی قائم ہوتی ہے۔
