عدالت عظمیٰ نے آج سوشانت سنگھ کیس کی تحقیقات سی بی آئی کے حوالے کردی ہے جس کا کہ سوشانت سنگھ کے اہل خانہ بھی مطالبہ کررہے تھے۔
عدالت عظمیٰ کے اس فیصلے کے بارے میں مختلف سیاسی جماعتوں کی طرف سے ردعمل کا اظہار بھی کیا جارہا ہے۔
اسی ضمن میں عام آدمی پارٹی کے سینئر رہنما اور راجیہ سبھا کے رکن پارلیمنٹ سنجے سنگھ کہا کہ سوشانت سنگھ کے اہل خانہ کی جانب سے بھی مطالبہ کیا گیا ہے کہ سی بی آئی کو پورے معاملے کی تحقیقات کرنی چاہئے۔
انھوں نے کہا کہ اگر سپریم کورٹ نے اس فیصلے کو منظور کرلیا ہے تو میرے خیال میں اس کے بعد کہنے کے لیے کچھ نہیں بچا ہے۔ اس معاملے کی فوری طور پر تحقیقات ہونی چاہئے اور میں امید کرتا ہوں ہوں اس معاملےمیں تیزی سے تحقیق کی جائے اور ملک کے سامنے سچ لایا جائے۔
مہاراشٹر حکومت کی جانب سے نظرثانی کی درخواست دائر کرنے کے سوال پر رکن پارلیمنٹ سنجے سنگھ نے کہا کہ یہ ریاستی حکومت کا حق ہوتا ہے اور مہاراشٹر حکومت اپنے حق کا استعمال کرسکتی ہے۔
