دربھنگہ: رمضان المبارک کے باوجود بازاروں سے رونق غائب

کورونا وبا کی دوسری لہر نے ایک بار پھرسے بازاروں کی رونقیں چھین لی ہیں، جس سے دکاندار کافی پریشان ہیں۔ ان کے مطابق جو وقت اصل میں خرید و فروخت کا ہوتا ہے حکومت نے ایسے ہی اوقات میں لاک ڈاؤن نافذ کر دیا ہے۔

رمضان المبارک کی آمد پر ضلع دربھنگہ کے بازاروں میں بھی کورونا بحران کے سبب حالات مختلف ہیں۔ گذشتہ برس کے لاک ڈاؤن کے سبب ہوئیں مالی مشکلات سے اب تک لوگ باہر نہیں نکل سکے ہیں کہ اس بار پھر بازاروں میں سناٹے جیسا ماحول ہے۔

دکاندار محمد رضوان نے کہا کہ' رمضان المبارک کے پیش نظر دکانداروں نے سامان تو سجا رکھے ہیں، لیکن خریدار کم ہونے کی وجہ سے دکانداروں کو کافی خسارے کا سامنا ہے۔ دربھنگہ کے دکانداروں کا کہنا ہے کہ' شام سات بجے سے دوکانوں کو بند کرنے کا حکم ہے۔ ایسے میں ہم لوگ کیا کمائیں گے۔

ایک اور دکاندار رضوان نے اس تعلق سے بتایا کہ 'شام کے اوقات میں ہی دکانداری ہوتی ہے اور حکومت نے 7 بجے سے دکان بند کرنے حکم دے رکھا ہے۔ ایسے میں ہم لوگ کیا کما سکے گے۔'