مدھیہ پردیش اردو اکیڈمی اور محکمہ ثقافت کے زیر اہتمام اردو ڈرامہ فیسٹیول 11 جنوری سے 16 جنوری تک روزانہ شام سات بجے سے رویندر بھون میں منعقد کیا جائے گا۔
پروگرام کی ابتدا میں اکیڈمی کی ڈائریکٹر ڈاکٹر نصرت مہدی نے اردو ڈرامہ فیسٹیول کے مقاصد پر روشنی ڈالتے ہوئے کہا کہ مدھیہ پردیش اردو اکیڈمی ہرسال ڈرامہ فیسٹیول کا انعقاد کرتی ہے۔ اسی کے تحت اس سال چھ ڈرامے پیش کئے جارہے ہیں۔
انہوں نے کہا کہ اس کا مقصد اردو زبان میں ڈراموں اور تھیٹر کی روایت کو زندہ رکھنا ہے ساتھ ہی اس کے ذریعے اس فن سے جڑے ہر فنکار کو اسٹیج فراہم کرنا بھی ہے۔ اس سال آزادی کا امرت مہوتسو کے موضوع کو بھی ڈراما فیسٹیول میں میں شامل کیا گیا ہے۔ پروگرام کے پہلے دن 'برسا منڈا' ڈرامہ پیش کیا گیا۔ یہ ڈرامہ مشہور ڈرامہ گروپ رنگ محلہ سوسائٹی فار پرفارمنگ آرٹ بھوپال کی جانب سے پیش کیا گیا۔
ڈاکٹر نصرت مہدی نے برسا منڈا کے بارے میں بتاتے ہوئے کہا کہ برسا منڈا کی زندگی انسان کی عزت نفس کے لیے جدوجہد کی علامت ہے۔ برسا منڈا کی زندگی قوم کو غلامی کی زندگی سے آزادی دلانے کی جدوجہد میں گزری۔ انہوں نے منڈاوں کو یکجا کر کے نئے سماجی نظام اور آزادی کے لیے لڑائی لڑی۔ ان کی اسی جدوجہد کو ڈرامے کی صورت میں ڈھال کر پیش کیا گیا۔
