ریاست مدھیہ پردیش میں بھارتیہ جنتا پارٹی کے وزیراعلی شیوراج سنگھ چوہان کا آڈیو اور ویڈیو وائرل ہوا ہے، جس میں انہوں نے صاف طور سے کہا ہے کہ کانگریس حکومت میں لگاتار منمانیاں کی جا رہی تھیں۔ کچھ محکمہ کو دگ وجے سنگھ نے لے رکھا تھا تو کچھ کمل ناتھ نے اپنے پاس رکھے تھے۔
انہوں نے کہا کسانوں کا 6 ہزار کروڑ کا قرض صرف کاغذ پر معاف کیا گیا۔ پورے صوبے میں دہشت کا ماحول پیدا ہوگیا تھا۔ ہمارے بھارتیہ جنتا پارٹی کے کارکنان کو کچلنے کی کوشش کی جارہی تھی۔ تب ہی مرکزی حکومت کی قیادت میں یہ طے کیا گیا کہ اب یہ حکومت گرنی چاہیے نہیں تو یہ سب برباد کر دیں گے۔
انہوں نے بھارتیہ جنتا پارٹی کے کارکنان سے کہا آپ ہی بتائیے جیوتی رادتیہ سندھیا اور تلسی رام سیلاوٹ کے بغیر کانگریس کی حکومت نہیں گر سکتی تھی۔ انہوں نے یہ بھی کہا کہ ہمیں تلسی رام سیلاوٹ کو ہر حال میں کامیاب بنانا ہے۔ انہوں نے کہا اگر تلسی رام نہیں جیتے تو میں وزیراعلی نہیں بن پاؤں گا۔
