مدھیہ پردیش حکومت نے اتراکھنڈ کے سابق گورنر عزیز قریشی کو اردو اکادمی کا نیا صدر مقرر کیا ہے۔ وہ آج اپنا عہدہ سنبھالیں گے۔
اس موقع پر انہوں نے ای ٹی وی بھارت کے ساتھ خصوصی گفتگو کی۔ انہوں نے بتایا کہ اردو اکادمی پورے بھارت میں بنائی گئی ہے۔ جو سابق وزیر اعظم اندرا گاندھی کا خواب تھا۔ جب انہیں احساس ہوا کہ اردو کے ساتھ نا انصافی ہو رہی ہے تو انھوں نے دہلی میں ایک میٹنگ طلب کی جو سیاسی میٹنگ تھی۔ آنجہانی اندرا گاندھی نے یہ حکم دیا کہ ہر ریاست میں اردو اکادمی تشکیل دی جائے'۔
عزیز قریشی نے اردو اکادمی کے صدر منتخب ہونے پر کمل ناتھ حکومت کا شکریہ ادا کیا۔ ساتھ ہی بی جے پی پر الزام لگاتے ہوئے انہوں نے کہا کہ '15 برسوں میں بی جے پی نے اردو اکادمی (مدھیہ پردیش) کو مکمل طور پر تباہ اور برباد کردیا ہے۔کانگریس کے رہنما عزیز قریشی نے الزام لگایا کہ گزشتہ 15 برسوں میں اردو اکادمی کے فنڈز کا غلط استعمال ہوا ہے، لیکن اب اکادمی کی پوزیشن بہتر ہوگی۔
عزیز قریشی نے بتایا کہ انہوں نے یہ حلف لیا ہے کہ وہ کوئی تنخواہ اور دوسرے فوائد اس عہدہ پر رہتے ہوئے نہیں لیں گے۔ ان کی کوشش ہوگی کام کرنے کے پرانے طریقے کو بدلا جائے اور اکادمی کی اردو لائبریری کو مزید بہتر بنایا جائے۔ تاکہ اردو کے فروغ اور ترقی کی راہیں آسان ہو جائیں۔
واضح رہے کہ عزیز قریشی مزورم کے 15 ویں گورنر تھے جو 31 دسمبر 2014 سے 28 مارچ 2015 تک گورنر کے طور پر رہے۔ اس سے قبل وہ اترپردیش اور اتراکھنڈ کے بھی گورنر رہ چکے ہیں۔
