قرنطینہ مراکز پر صفائی کا کوئی نظام نہیں

دیگر ریاستوں سے خصوصی ٹرینوں کے ذریعہ لوٹ رہے مزدوروں کیلئے ریاست بہار کے بھاگلپور شہر میں بھی جگہ جگہ کوارنٹائن سینٹر بنائےگئے ہیں جہاں ان مزدوروں کو قرنطینہ میں رکھا گیا ہے۔

بھاگلپور سے تقریبا دس کلو میٹر دور جگدیش پور بلاک میں پھلوریہ مڈل اسکول کا قرنطینہ مرکز ہے۔ جو آبادی سے تھوڑی دوری پر واقع ہے اور ضلع انتظامیہ نے یہاں ٹھہرائے گئے مزدوروں کیلئے کھانے پینے اور دیگر سہولیات فراہم کی ہیں۔ لیکن صفائی ستھرائی یہاں ایک بڑا مسئلہ ہے جو کووڈ-19 سے بچاؤ کیلئے سب سے ضروری ہے۔

اس قرنطینہ مرکز کے 58 کمروں میں 178 لوگوں کو ٹھہرایا گیا ہے، جس میں حیدرآباد سے لوٹنے والی قریب دس خواتین اور بچے بھی شامل ہیں۔

ان لوگوں کی شکایت تھی کہ دودھ انتہائی پتلا ہوتا ہے جسے بچے نہیں پیتے ہیں۔ اس کے علاوہ زیادہ تر کھانے کے اوقات میں ایک ہی طرح کی سبزی دینے کی شکایت بھی کی۔

ان لوگوں کی شکایت کو دیکھتے ہوئے بھاگلپور ڈی آر ڈی اے کے ڈائریکٹر پرمود کمار پانڈے نے بذات خود حالات کا جائزہ لیا اور کھانے پینے کا معیار بہتر کرنے کی ہدایات جاری کی۔ حالانکہ انہوں نے کیمرہ پر کچھ بھی بولنے سے انکار کیا لیکن زبانی طور پر انہوں نے کہا کہ ضلع انتظامیہ ان لوگوں کیلئے بہتر سے بہتر انتظام کرنے کی کوشش میں ہے۔

اب تک بیرون ریاست میں پھنسے مزدوروں کو لے کر چار خصوصی ریل گاڑیاں بھاگلپور پہنچ چکی ہیں اور ان لوگوں کیلئے بھاگلپور کے الگ الگ بلاکوں میں اسی طرح قرنطینہ مراکز بنائے گئے ہیں۔

قرنطینہ مراکز پر صفائی کا کوئی نظام نہیں

بیرون ریاست سے مزدوروں کی آمد کے ساتھ ہی بھاگلپور میں بھی کورونا مریضوں کی تعداد میں اچانک تیزی سے اضافہ ہوگیا ہے لہذا ایسے مراکز کی نگرانی کرنا اور بیماری کو مقامی لوگوں میں نہ پھیلنے دینا ضلع انتظامیہ کیلئے ایک بڑا چیلنج ہے۔