یادگیر میں روڈ سیفٹی ویک کے تحت آج شاستری چوک سے اولڈ بس اسٹینڈ تک ایک ریلی نکالی گئی جس میں اسکول اور کالج کے طلباء نے شرکت کی اور ’محفوظ ڈرائیونگ‘ سے متعلق نعروں پر مشتمل پلے کارڈ اٹھائے ہوئے تھے۔
اس موقع پر سکریٹری ڈسٹرکٹ لیگل سرویس اتھاریٹی ساحل احمد نے ٹریفک قوانین پر عمل کرنے کا شہریوں کو مشورہ دیا۔ انہوں نے کہا کہ ڈرائیونگ کرتے وقت اپنی جان کے علاوہ دوسروں کی جان کی بھی پرواہ کرنی چاہئے اور ٹریفک قوانین پر سختی سے عمل کرنا چاہئے۔
ناصر احمد ، صدر گاندھی اسکول و کالج نے کہا کہ 18 سال سے کم عمر کے بچوں کو گاڑیاں نہیں چلانا چاہئے۔ انہوں نے کہا کہ ہائی اسکول کے بچوں کو گاڑیوں پر اسکول نہیں جانا چاہئے جب کہ نابالغ لڑکوں کا گاڑی چلانا قانوناً جرم ہے جس کے لیے جرمانہ اور سزا بھی ہوسکتی ہے۔
- یہ بھی پرھیں:یادگیر: لکھیم پور تشدد معاملے میں شدید احتجاج
اس موقع پر ریجنل ٹرانسپورٹ آفیسر دامودر نے بھی خطاب کیا۔ ٹریفک سب انسپکٹر محبوب علی کے علاوہ آٹو یونین کے صدر اور موٹر ڈرائیونگ اسکول کے ذمہ داران بھی موجود تھے۔
