ریاست کر ناٹک کے شہر گلبرگہ کے ای ایس آئی اور جیمس اسپتال کو کورونا متاثرہ مریضوں کے علاج کے لیے مختص کیاگیا ہے، لیکن ان دونوں ہسپتالوں میں کورونا کے مریضوں اور متاثرین پر کسی قسم کی توجہ نہ دینے کا سنگین الزام سامنے آیا ہے۔
کورونا متاثرین کو ہسپتال کے کوارنٹائن سینٹر میں رکھا گیا ہے۔ ہسپتالوں کے آئیسولشن وارڈز میں داخل مریضوں کو دیکھنے کے لئے ڈاکٹرز اور نرسز کے وقت پر نہ آنے کی شکایت سننے میں آرہی ہے۔
دونوں ہسپتالوں میں صفائی کا بھی ناقص انتظام ہونے سے مریضوں کو سخت دشواریوں کا سامنا کر نا پڑرہا ہے۔
کوارنٹائن میں رکھے گئے متاثرین اور آئیسولیشن وارڈز میں داخل مریضوں کی دیکھ بھال کا معقول انتظام نہ ہونے سے عزیز و اقارب کوان کی دیکھ بھال کرنی پڑرہی ہے۔
جس کے نتیجہ میں کورونا وائرس کے مزید پھیلنے کا خدشہ قائم ہے۔ سابق ریاستی وزیر پریانک کھرگے اور ڈاکٹر اجے سنگھ رکن اسمبلی نے گلبرگہ کانگریس آفس میں پریس کانفرنس منعقد کرتے ہوئے ای ایس آئی اور جیمس ہسپتال کی ناقص کارکردگی پر عدم اطمینان کا اظہار کیا اور اس سلسلے میں فوری ضروری اقدامات کر نے کا مطالبہ کیا۔
