کرناٹک اسمبلی میں متنازع گئو کشی مخالف بل کی منظوری کے بعد حزب اختلاف کانگریس پارٹی نے کہا ہے کہ وہ بی جے پی حکومت کی اس کارروائی کے خلاف احتجاج کرتے ہوئے جمعرات کو اسمبلی کی کارروائی کا بائیکاٹ کرے گی۔
کرناٹک اسمبلی میں کانگریس کے رہنما سدارمیا نے میڈیا سے کہا کہ بی جے پی حکومت نے گئوکشی مخالف بل کے متعلق بزنس ایڈوائزری کمیٹی سے کسی طرح کا مشورہ نہیں کیا اور اسے اسمبلی میں پیش کر دیا۔ اس لئے ہم لوگوں نے جمعرات کی کارروائی سے خود کو الگ رکھنے کا فیصلہ کیا ہے۔
انہوں نے اپنے ٹویٹ میں لکھا کہ حکومت حزب اختلاف کے ارکان اسمبلی یہاں تک کہ حزب اختلاف کے رہنما کی بھی عزت نہیں کرتی ہے۔ انہوں نے کہا کہ یہ کرناٹک اسمبلی کی تاریخ کا سیاہ دن ہے۔
سدارمیا نے کہا کہ بل کو اچانک پیش کرنا اور اسے بغیر بحث کے منظور کر دینا جمہوریت کا قتل ہے۔ انہوں نے حکومت پر الزام لگایا کہ وہ گئو کشی مخالف بل جیسے معاملات کو سامنے لاکر اپنی ناکامیوں کو چھپانے اور لوگوں کو گمراہ کرنے کی کوشش کر رہی ہے۔
سدارمیا نے مزید کہا کہ کانگریس کرناٹک بی جے پی کے جمہوریت مخالف کام کے خلاف احتجاج میں کل (جمعرات) اسمبلی اجلاس کا بائیکاٹ کرے گی۔
