شمالی کشمیر کے ضلع بارہمولہ میں کورونا کیسز میں ہو رہے اضافے کے پیش نظر دوبارہ لاک ڈاؤن نافذ کئے جانے کی وجہ سے منگل کے روز معمولات زندگی درہم وبرہم ہو کر رہ گئے۔
شہرہ آفاق سیاحتی مقام گلمرگ کی طرف جانے والی سڑک کو ٹنگمرگ میں ہی بند کر دیا گیا ہے۔
ادھر تاجر برادری نے انتظامیہ کی طرف سے ضلع میں دوبارہ لاک ڈاؤن نافذ کرنے پر برہمی اظہار کیا ہے۔
ضلع مجسٹریٹ ڈاکٹر جی این یتو کی طرف سے جاری ایک حکمنامے میں کہا گیا ہے کہ کورونا کے کیسز میں اضافے کے پیش نظر ضلع میں بشمول مین ٹاؤن بارہمولہ، سوپور، پٹن، کنزر، ٹنگمرگ، کریری، واگورہ، وترگام، روہامہ اور ڈنگی وچھی میں 25 اگست سے 29 اگست تک تمام دکانیں اور کارباری ادارے بند رہیں گے۔
ذرائع نے بتایا کہ ضلع میں منگل کے روز تمام دکانیں اور کاروباری ادارے بند رہے اور سڑکوں پر پبلک ٹرانسپورٹ کی نقل وحمل بھی معطل رہی تاہم نجی گاڑیوں کی آمد و رفت جاری رہی۔
انہوں نے کہا کہ لاک ڈاؤن کے نفاذ کو یقینی بنانے کے لئے ناکے بٹھائے گئے ہیں جہاں سیکورٹی فورسز اہلکار گاڑیوں کی چیکنگ اور ضروری چھان بین کرتے ہیں۔
دریں اثنا تاجر برادری نے انتظامیہ کی طرف سے لاک ڈاؤن کے دوبارہ نفاذ پر برہمی کا اظہار کیا ہے۔
ان کا کہنا ہے کہ وادی کے دیگر اضلاع میں بھی کورونا کیسز میں اضافہ ہورہا ہے لیکن وہاں دوبارہ لاک ڈاؤن نافذ نہیں کیا گیا ہے۔
