سابق وزیر اور کانگریس رکن پارلیمان (راجیہ سبھا) حسین دلوائی نے اورنگ آباد میں مولانا آزاد وچار منچ کے تربیتی اجلاس سے خطاب کرتے ہوئے کہا کہ موجودہ حالات میں اقلیتوں کو درپیش دشواریوں اور مسائل کا بھی جائزہ لیا گیا۔
اورنگ آباد میں مولانا آزاد ریسرچ سینٹر کے دوروزہ تربیتی اجلاس میں تمام مذاہب اور مکاتب فکر کے لوگ جمع تھے، مقصد ملک کو درپیش چلیینجز اور ان کا حل تلاش کرنا رہا۔
پروگرام میں سابق وزیر اور موجودہ کانگریس رکن پارلیمان (راجیہ سبھا) حسین دلوائی نے خصوصی شرکت کی اس موقع پر حسین دلوائی نے خطاب کرتے ہوئے مرکزی حکومت کی پالیسیوں پر نکتہ چینی کی ان کا کہنا تھا کہ 'موجودہ حکومت پھوٹ ڈالو کی سیاست کررہی ہے لیکن ملک کی عوام بیدار ہوچکی ہے'۔
حسین دلوائی کے مطابق سی اے اے اور این آر سی کے خلاف جاری ملک گیر احتجاج مہاتما گاندھی کے فلسفے عدم تشدد کی بہترین مثال ہے۔
اس دوروزہ تربیتی اجلاس میں ریاست بھر کے مختلف اضلاع سے وچار منچ کے ذمہ داروں اور کارکنوں نے شرکت کی۔ اس اجلاس کا مقصد مولانا آزاد کی تعلیمات کی روشنی میں اقلیتوں کے حقوق کا تحفظ اور ان کے حل کے لیے آواز اٹھانا ہے۔ منچ کے صدر نے بتایا کہ اجلاس میں تمام امور پر بحث کی گئی ہے۔
اس اجلاس میں مختلف مکاتب فکر اور سماجی تنظیموں سے وابستہ افراد نے کثیر تعداد میں شرکت کی۔ قابل ذکر بات یہ ہےکہ مولانا آزاد منچ خالص سیکولر منچ کا نظارہ پیش کررہا تھا کیونکہ اجلاس میں تمام مذاہب کے لوگ مولانا آزاد کے نام پر جمع ہوئے تھے۔
