اورنگ آباد: اسکول جانے کیلئے بچے اپنی جان خطرے میں ڈالنے پر مجبور

مہاراشٹر کے اورنگ آباد ضلع کے پھلمبری تعلقہ میں واقع پیر باوڑہ گاؤں میں بچے اسکول جانے کے لیے اپنی جان کو خطرے میں ڈالنے پر مجبور ہیں۔ خبر دیکھیں

اورنگ آباد: تعلیم کو بچوں کا بنیادی حق کہا گیا ہے، لیکن اپنے اسی حق کو پانے کے لیے اسکولی بچوں کو جان جوکھم میں ڈالنی پڑھ رہی ہے۔ آپ کو بھلے یقین نہ آئے لیکن یہ حقیقت ہے۔ اورنگ آباد کے پھلمبری تعلقہ میں بچوں کو اسکول جانے کے لیے تالاب پار کرنا پڑھتا ہے۔

تالاب کے بہتے پانی میں، اوبڑ کھابڑ، کیچڑ اور پھسلن والے راستے پر چلتے یہ ننھے قدم تفریح نہیں کر رہے بلکہ اسکول جانے کے لیے اس دشوار گزر گاہ کو پار کرنے کی کوشش کر رہے ہیں۔ بہتے پانی سے نجات پانے کی صورت میں انھیں دس فٹ طویل دیوار پار کرنی ہے، پھر چار کلو میٹر کا راستہ پیدل طے کرنا ہے۔

یہ کسی فلم کا منظر نہیں بلکہ اورنگ آباد کے پھلمبری تعلقہ میں واقع پیر باوڑہ گاؤں کا ہے۔ پیر باوڑہ کی پیاس بجھانے والا یہ تالاب برسات کے موسم میں پیر باوڑہ کا رابطہ ہنومان نگر سے کاٹ دیتا ہے اور طلبا و طالبات کو اسکول جانے کے لیے اپنی جان جوکھم میں ڈالنی پڑھتی ہے۔

پیر باوڑہ کی ہنومان بستی میں پچاس سے زائد خاندان آباد ہیں۔ بارش کےموسم میں اس بستی کے سینکڑوں طلبہ ناصرف تعلیم سے محروم رہ جاتے ہیں بلکہ بیمار اور بڑے بزرگوں کے علاج و دیگر ضروریات کے لیے بھی کافی دشواریاں آتی ہیں۔ یہاں کے لوگوں کا کہنا ہے کہ تالاب پر پل کی تعمیر کے لیے سرکاری حکام سے لیکر سیاسی رہنماؤں تک ہر کسی سے نمائندگی کی گئی لیکن مسئلہ حل نہیں ہوسکا۔