مہاراشٹرا کے اورنگ آباد میں کورونا کے مریضوں کی تعداد بڑھ کر چوبیس ہوگئی ہے۔ شہر میں ایک ہی دن میں چار مریضوں کی طبی رپورٹ مثبت آئی ہے جس کی وجہ سے کورونا وائرس مثبت مریضوں کی تعداد میں اضافہ ہوا ہے۔
مذکورہ جانکاری شہر کے میئر نند کمار گھوڑیلے نے دی ہے۔ میئر کا کہنا ہے کہ یہ جو مریض کورونا وائرس مثبت پائے گئے ہیں یہ سارے مریض باہر سے نہیں آئے ہیں بلکہ یہ سارے مریض جو پہلے کورونا وائس مثبت پائے گئے تھے ان کے رابطے میں تھے۔
انہوں نے کہا کہ جہاں پر بھی یہ چار مریض پائے گئے ہیں ان سبھی علاقے کو پوری طرح سے سیل کر دیا گیا ہے۔ ان علاقوں میں نہ کسی کو آنے دیا جا رہا ہے اور نہ ہی کسی کو باہر جانے کی اجازت ہے۔ اورنگ آباد میونسپل انتظامیہ کے اہلکار ان علاقوں میں جاکر لوگوں کی صحت سے متعلق سروے بھی کر رہے ہیں۔
نند کمار گھوڑیلے نے کہا کہ شہر میں تمام احتیاطی تدابیر کی گئی ہے اور باشندوں کو فکر مند ہونے کی ضرورت نہیں ہے۔ واضح ہو کہ گزشتہ دو دنوں سے اورنگ آباد میں ایک بھی نیا مریض سامنے نہیں آیا ہے۔
اورنگ آباد میں 2 سو سے زائد لوگوں کو کورینٹین میں رکھا گیا ہے۔
میئر نے کہا کہ کویڈ ڈیڈیکیٹ اسپتال اورنگ آباد کے سرکاری اسپتال میں بنایا گیا ہے۔ انہوں نے کہا کہ کرونا وائرس سے لڑنے کے لیے ہم پوری طرح تیار ہیں لیکن عوام کی حمایت ضروری ہے تبھی ہم اس میں فتح حاصل کر سکتے ہیں۔ عوام سے اپیل ہے کہ وہ اپنے گھروں میں رہیں، باہر نہ نکلیں۔ لاک ڈاؤن میں دوسرے تمام لوگوں کی مدد کریں۔
