پہلگام کے ڈرائیورز کا احتجاج

ڈرائیورز کے مطابق جو بھی سیاح سرینگر سے پہلگام کا رخ کرتے ہیں وہ پہلے ماورہ سومو اسٹینڈ جاتے ہیں اور وہیں سے دوسرے سیاحتی مقامات پر جاتے ہیں، جس کے باعث اُن کا روزگار متاثر ہورہا ہے۔

ضلع اننت ناگ کے پہلگام میں ڈرائیورز نے سومو اسٹینڈ ٹریڈ اسوسی ایشن کے بینر تلے احتجاج کیا۔ ڈرائیورز کا مطالبہ ہے کہ جو بھی سیاح سرینگر سے اننت ناگ کی سیر کے لیے آتے ہیں انہیں پہلے پہلگام لایا جائے۔ احتجاج میں تقریباً 600 ڈرائیوز شامل تھے۔

احتجاجیوں نے گورنر انتظامیہ سے پہلگام کے سومو ڈرائیورس کے ساتھ انصاف کرنے کی اپیل کی ہے۔

احتجاجیوں نے میڈیا سے بات کرتے ہوئے کہا ہے کہ 'یہاں پر ہر وقت امداد پہنچانے کے لیے ہم لوگ ہی ہوتے ہیں اور آج ہمارا حق چھیننے کی کوشش کی جارہی ہے، جو ہم برداشت نہیں کریں گے'۔

انہوں نے کہا کہ اگر پہلگام میں امن و امان برقرار رکھنا ہے تو یہاں غلط لوگوں کو گاڑیاں چلانے کی اجازت نہ دی جائے۔

مظاہرین کے مطابق ماورہ میں قائم سومو اسٹینڈ کی جانب سے اُن کو مختلف سیاحتی مقامات جیسے بیتاب ویلی اور آڈو پر چلنے سے ان کے روزگار پر اثر پڑ رہا ہے۔

ان کا کہنا ہے کہ جو بھی سیاح سرینگر سے پہلگام کا رخ کرتے ہیں وہ پہلے ماورہ سومو اسٹینڈ میں جاتے ہیں اور وہیں سے دوسرے سیاحتی مقامات پر جاتے ہیں۔ جس کے باعث اُن کے روزگار پر بہت برا اثر پڑرہا ہے اور وہ پونے والوں کو نظر انداز کررہے ہیں۔