جموں و کشمر کے اننت ناگ-کشتواڑ سڑک (NH244) پر دن رات برف ہٹانے کا کام چل رہا ہے۔ نیشنل ہائی ویز اینڈ انفرا سٹرکچر ڈیولپمینٹ کارپوریشن لمیٹڈ National Highways and Infrastructure Development Corporation Limited کے جنرل منیجر نے سنتھن ٹاپ سڑک پر برف ہٹانے کے کام کا جائزہ لے رہے ہیں۔ 265 کلومیٹر پر مشتمل یہ شاہراہ کشمیر کے ضلع اننت ناگ اور جموں صوبہ کے ضلع کشتواڑ کو جوڑتی ہے۔ اننت ناگ-کشتواڑ سڑک پر برف ہٹانے کا کام این ایچ آئی ڈی سی ایل (NHIDCL) اور ایک نجی کمپنی کے اشتراک سے گزشتہ ماہ سے چل رہا ہے اور امید کی جا رہی ہے کہ موسم سازگار ہونے کی صورت میں اسے فوراً ٹریفک کی آمدورفت کے لیے بحال کیا جائے گا۔
شاہرہ پر کام کرنے والے افراد نے ای ٹی وی بھارت کے نمائندے سے بات کرتے ہوئے کہا کہ اس سڑک پر ٹریفک کی آمدورفت کو یقینی بنانے کے لئے ہم نہ صرف دن کے اجالے میں بلکہ ہم رات کی تاریکی میں اپنی جان کو خطرہ میں ڈال کر سڑک پر برف ہٹانے کا کام جاری رکھے ہوئے ہیں.
انہوں نے کہا کہ ہمیں بہت سارے مشکلات درپیش آئے لیکن ہم نے کبھی ہار نہیں مانی اور یہی وجہ ہے کہ ہم سنتھن ٹاپ کے کافی نزدیک پہنچ گئے ہیں، انہوں نے کہا کہ شاہراہ کو ٹریفک کی آمدورفت کے لئے اسی ہفتے میں کھولا جائے گا، تاکہ لوگوں کی مشکلات کا ازالہ وقت پر ممکن ہو سکے.
نیشنل ہائی ویز اینڈ انفرا سٹرکچر ڈیولپمینٹ کارپوریشن لمیٹڈ (این ایچ آئی ڈی سی ایل) کے جنرل منیجر آر این شرما نے کہا کہ میں ذاتی طور پر منسلک سڑک پر برف ہٹانے کے کام کا جائزہ لے رہا ہوں. انہوں نے کہا کہ شاہرہ پر برف ہٹانے کا کام کرنے والے لوگوں کی مسلسل کوششوں کی وجہ سے ہی یہ سب ممکن ہو پایا۔
انہوں نے مزید کہا کہ ہم اپنی طرف سے پوری کوشش کریں گےکہ آج رات کو ہی ٹاپ تک ہماری کم سے کم ایک مشین پہنچ جائے، تاکہ دوسری مشینوں کو برف ہٹانے میں آسانی ہو۔ انہوں نے ضلع انتظامیہ اننت ناگ کا شکریہ ادا کرتے ہوئے کہا کہ ضلع انتظامیہ اننت ناگ اور این ایچ آئی ڈی سی ایل کے افسران کے بیچ ایک اچھے تال میل کے باعث سنتھن ٹاپ کی چوٹی تک برف ہٹانے میں کامیاب رہے.
