بابری مسجد کی 27 ویں برسی کے پیش نظر ضلع علی گڑھ میں خاص طور پر بازاروں، چوراہوں، تاریخی جامع مسجد سمیت دیگر مقامات پر سخت حفاظتی انتظامات کیے گئے تھے۔
اس موقعے پر علی گڑھ شہر کی جامع مسجد میں بعد نماز جمعہ شہر مفتی نے ملک میں امن و امان اور بھائی چارہ کے لیے خصوصی دعا مانگی۔
یاد رہے کہ ایک طویل سماعت کے بعد عدالت عظمی نے 9 نومبر 2019 کو فیصلہ سناتے ہوئے ایودھیا میں واقع متنازع زمین ہندو فریق کو سونب دیا ہے جبکہ مسلم فریق کو اس کے عوض پانچ ایکڑ زمین الگ سے دینے کا حکم جاری کیا گیا ہے۔
مسلم یونیورسٹی طلبا یونین کے سابق صدر سلمان امتیاز نے جمعہ کی نماز کے بعد شہر کی جامع مسجد میں اپنے خیالات کا اظہار کرتے ہوئے عوام سے امن برقرار رکھنے کی اپیل کی۔
انہوں نے مزید کہا کہ 'عدالت عظمیٰ کا فیصلہ بابری مسجد کے خلاف آیا جبکہ سارے ثبوت مسجد کے حق میں تھے اور ناانصافی کے خلاف آواز بلند کرنی چاہیے لیکن ہر ایک چیز کا طریقہ ہے۔'
علی گڑھ ایس پی (سٹی) ابھیشیک نے بتایا کہ 'آج 6 دسمبر کے پیش نظر علی گڑھ شہر کے سبھی خاص بازاروں، علاقوں اور مساجد کے آس پاس پولیس کو تعینات کیا گیا اور امن میٹنگ بھی کرائی گئی تھی۔ ابھی تک کسی بھی علاقے سے کوئی حادثے کی اطلاع نہیں ملی ہے۔ سوشل میڈیا پر بھی نظر رکھی جارہی ہے۔
