علی گڑھ مسلم یونیورسٹی سے محمد علی جناح کی تصویر ہٹانے کا مطالبہ

اترپردیش اسمبلی انتخابات سے قبل بی جے پی نے ایک بار پھر محمد علی جناح کی تصویر کو لے کر احتجاج کرنا شروع کردیا ہے، اس ضمن میں علی گڑھ کے اندر بی جے پی کے لوگوں نے محمد علی جناح کی تصویر کو ٹوائلیٹ میں چسپاں کر علی گڑھ مسلم یونیورسٹی سے ہٹانے کا مطالبہ کیا۔

جیسے جیسے اترپردیش میں اسمبلی انتخابات کا وقت قریب آرہا ہے، بی جے پی کارکنان پوری ریاست کے اندر فرقہ واریت کو ہوا دے رہے ہیں۔ پاکستان کے بانی محمد علی جناح کی تصویر علی گڑھ مسلم یونیورسٹی سے ہٹائے جانے کو لے کر بی جے پی سراپا احتجاج ہے۔ اس ضمن میں بی جے پی یووا مورچہ کے لوگوں نے گاندھی پارک تھانہ علاقے کے پرانے روڈ ویز بس اسٹینڈ کے نزدیک محمد علی جناح کی تصویر بیت الخلاء میں چسپاں کردی۔

بی جے پی کے یووا ترجمان شیوانگ تیواری نے کہا کہ محمد علی جناح کی تصویر علی گڑھ مسلم یونیورسٹی کے اندر نہیں ہونا چاہیے۔

واضح رہے کہ علی گڑھ مسلم یونیورسٹی میں پاکستان کے بانی محمد علی جناح کی تصویر برسوں سے لگی ہے۔

حال کے کچھ برسوں میں بی جے پی اسے سیاسی ہتھکنڈے کے طور پر استعمال کرکے ایک خاص طبقے کے وووٹ حاصل کرتے آئی ہے۔ اب جب کہ یوپی میں اسمبلی انتخابات ہونے والے ہیں تو ایک بار پھر محمد علی جناح کی تصویر کے سہارے سیاسی روٹیاں سینکنے کی کوشش کی جارہی ہے۔