کورونا کی دوسری لہر کے دوران گزشتہ پچیس دنوں میں 60 سے زیادہ اے ایم یو کے ریٹائرڈ، تدریسی و غیر تدریسی ملازمین کی اموات ہو چکی ہیں۔ جس کی وجہ سے علی گڑھ مسلم یونیورسٹی میں صدمے کا ماحول ہے۔ کورونا وبا کی رہنما ہدایات کے مطابق علی گڑھ مسلم یونیورسٹی بند ہے جس کی وجہ سے یونیورسٹی میں طلبا کے رہائشی ہال بھی بند ہیں۔
اے ایم یو میں موجود طلبا جو کسی وجہ سے اپنے گھر نہیں جا سکے انہوں نے عید الفطر کے موقع پر اپنے خیالات کا اظہار کرتے ہوئے کہا کہ 'اس وقت علی گڑھ مسلم یونیورسٹی میں غم کا ماحول ہے، چاروں طرف سناٹا ہے، عید الفطر کے موقع پر بھی اے ایم یو میں رونق نہیں ہے، جبکہ عیدالفطر کے روز صبح سے رات تک رونق رہتی تھی'۔
طالب علم حیدر علی نے بتایا کہ 'صبح علی گڑھ مسلم یونیورسٹی کی تاریخی جامع مسجد میں عید الفطر کی نماز ادا کی جاتی تھی جس میں بڑی تعداد میں یونیورسٹی کے طلبا، تدریسی و غیر تدریسی عملے کے ساتھ مقامی لوگ بھی شرکت کیا کرتے تھے لیکن کورونا وبا اور لاک ڈاؤن کے سبب اے ایم یو کی جامع مسجد میں بھی عید الفطر کی نماز ادا نہیں کی گئی'۔
کورونا کی دوسری لہر کے دوران اے ایم یو کے تقریباً 60 سے زیادہ تدریسی و غیر تدریسی اور ریٹائرڈ ملازمین کی اموات ہونے سے علیگ برادری صدمے میں ہے۔
