اے ایم یو اولڈ بوائز ایسوسی ایشن لکھنؤ کے عہدیداران کا ایک وفد یونیورسٹی پہنچنے کے بعد سیکریٹری سید محمد شعیب کی سربراہی میں پرو وائس چانسلر پروفیسر ظہیر الدین، پروفیسر ایم ایم سفیان بیگ، چیئرمین المنائی کمیٹی سے ملاقات کی اور یونیورسٹی کے سابق طلبا کے فنڈز کے لیے ایک لاکھ روپے کا چیک بھی فراہم کیا۔
اولڈ بوائز ایسوسی ایشن، لکھنؤ کے وفد نے اے ایم یو کے پرو وائس چانسلر پروفیسر ظہیر الدین کو میمورنڈم دے کر یونیورسٹی کے مختلف مسائل پر انتظامیہ سے خصوصی توجہ دینے کے ساتھ ساتھ اے ایم یو کے سابق طالب علم ڈاکٹر کلب صادق کے نام سے چیئر قائم کرنے کا بھی مطالبہ کیا۔
اے ایم یو اولڈ بوائز ایسوسی ایشن لکھنؤ کے جوائنٹ سیکرٹری عاطف حنیف نے خصوصی گفتگو میں بتایا کہ ہمارر وفد نے یونیوسٹی انتظامیہ کو ایک میمورنڈم دیا ہے، جس میں بہت سارے پوائنٹ تھے، جیسے کلب صادق کے نام سے ہم لکھنؤ میں اسکالرشپ اور ایوارڈ شروع کر رہے ہیں، اور کلب صادق کے نام سے اے ایم یو میں ایک چیئر قائم کروانا چاہتے ہیں۔
اے ایم یو اولڈ بوائز ایسوسی ایشن، لکھنؤ کے جنرل سیکرٹری سید محمد شعیب نے بتایا کہ ہم لوگوں نے ایک لاکھ روپے المنائی فنڈز میں عطیہ کیے ہیں لیکن کسی وجہ سے وائس چانسلر سے ملاقات نہیں ہو سکی اور پرو وائس چانسلر پروفیسر ظہیر الدین سے ملاقات کرکے ہم نے ان کو ایک میمورنڈم دیا ہے۔
میمورنڈم کے مطالبات میں ایک اہم مطالبہ یہ ہے کہ اے ایم یو کے لوگو سے "علم الانسان مالم یعلم" کو ہٹا دیا گیا ہے اور اس کی جگہ ستارے لگا دیے گئے ہیں، جس کو لے کر علیگ برادری میں ناراضگی ہے،اس وجہ سے میمورنڈم میں یہ فیصلہ لیا ہے اس پر وائس چانسلر نظرثانی کریں۔
