خواجہ کے شہر میں باران رحمت

ریاست راجستھان کے ضلع اجمیر میں آج جم کر بارش ہوئی، جس سے مقامی لوگوں کو راحت تو ملی ہی ساتھ ہی درگاہ اجمیر کی زیارت کے لیے ملک بھر سے آئے زائرین نے بھی اس بارش کا خوب لطف اٹھایا۔

برسات سے موسم خوشنما ہوگیا ہے، اس موقعے پر زائرین بارش کے پانی میں نہاتے نظر آ ئے، بچوں نے بھی برساتی پانی میں خوب ڈبکیاں لگائیں۔ اس کے علاوہ درگاہ شریف کے اردگرد کے علاقوں میں برسات کے پانی سے بازاروں کی سڑکیں نالوں میں تبدیل ہو گئیں۔

واضح رہے کہ گزشتہ دنوں اجمیر شریف شدید گرمی کی گرفت میں تھا اور تپش کا یہ عالم تھا کہ یہاں کا درجۂ حرارت 45 ڈگری تک پہنچ گیا تھا۔

جس کی وجہ سے عوام گرمی میں بی چین تھے۔ ایسے میں اب موسم کا مزاج بدل گیا ہے اور اجمیر شریف میں باران رحمت کا نزول ہو رہا ہے۔

محکمہ موسمیات نے شہر میں آئندہ مزید بارش کی امید ظاہر کی ہے۔