راجستھان کے شہر اجمیر میں کورونا وائرس کے معاملے پر پورے بھارت کی طرح یہاں بھی لاک ڈاؤن نافذ ہے۔ ایسے میں اجمیر میں مختلف ملی و مذہبی تنظیموں نے شب برأت کے موقع پر مسلمانوں سے گھروں میں رہ کر عبادت کرنے کی اپیل کی ہے۔
وزیر اعظم نرندر مودی کے لاک ڈاؤن کے اعلان کے ساتھ ہی اجمیر کے باشندوں نے اس پر بخوبی عمل کیا ہے۔ اس ضمن میں ای ٹی وی بھارت کے ساتھ بات چیت کرتے ہوئے حضرت خواجہ معین الدین چشتی ؒ کی درگاہ کے خادم حاجی سید عمران چشتی نے کہا کہ اجمیر میں لوگ حکومت کی ہدایت پر مکمل طور سے عمل کر رہے ہیں۔ درگاہ کے علاقے اور پورے اجمیر میں کوئی بھی باہر نہیں نکل رہا ہے۔
انہوں نے کہا کہ شب برأت کے موقع پر مختلف ملی اور مذہبی تنظیموں نے مسلمانوں کو گھر سے باہر نہ نکلنے کی اپیل جاری کی ہے، جس پر بھی مسلمان عمل کریں گے اور اس موقع پر اپنے گھروں میں ہی عبادت کریں گے۔
عمران چشتی نے کہا کہ حکومت کی ہدایت کے مطابق لوگ صفائی کا خاص خیال رکھ رہے ہیں۔ ماسک کا استعمال ہو یا سینیٹائز کا ہر طرح سے لوگ خود کی حفاظت کرنے کی کوشش کر رہے ہیں۔
واضح ہو کہ درگاہ سے متعلق تنظیمیں غریبوں کے درمیان اناج تقسیم کر رہی ہے اور آج مختلف تنظیموں نے لوگوں کو گھر پر رہنے کی اپیل کی ہے۔ اجمیر میں پولس مارچ بھی کر رہی ہے تاکہ لاک ڈاؤن کو یقینی بنایا جا سکے۔ اس کے علاوہ میڈیکل ٹیم بھی تعینات کی گئی ہے، جس سےکورونا وائرس متاثرہ کی نشاندیہی ہو سکے۔
