احمدآباد شہر کو آباد کرنے والے احمد شاہ نے بیش قیمتی تاریخی وراثتیں تعمیر کرائی تھی۔ یہی وجہ ہے کہ احمدآباد شہر ایک تاریخی شہر ہے۔ ان تاریخی وراثتوں میں سے ایک احمد شاہ بادشاہ کا مقبرہ بھی ہے جو بادشاہ کے حجرہ کے نام سے مشہور ہے۔ احمد شاہ بادشاہ کے مقبرے میں جانے سے پہلے ایک تاریخی دروازہ بنا ہوا ہے، جسے عام طور سے نوبت خانہ کہا جاتا ہے اس نوبت خانے میں آج بھی احمد شاہ بادشاہ کو سلامی دینے کے لیے نوبت بجائی جاتی ہے۔
تاریخ کے اوراق میں ہے کہ 610 سال سے اب تک احمدشاہ بادشاہ کی یاد میں نوبت بجائی جاتی ہے۔
دراصل نوبت ایک روایتی موسیقی ہے جس میں تین طرح کے ساز کے آلوں کا استعمال کیا جاتا ہے۔ یہاں کے نوبت خانہ میں تین تار کی نوبت بجائی جاتی ہے۔ جس میں شہنائی، نگارہ اور طبلے کا استعمال کیا جاتا ہے۔
کہا جاتا ہے کہ بادشاہ کے زمانے میں نوبت بجاکر احمد شاہ بادشاہ کی روانگی کا اعلان کیا جاتا تھا، ساتھ ہی مہمانوں کا استقبال، جنگوں کا آغاز، شاہی خاندان میں بچوں کی پیدائش و سالگرہ، شادی اور انتقال کے موقع پر نوبت بجائی جاتی تھی جو روایت آج بھی جاری ہے۔
مزید پڑھیں: احمدآباد میونسپل کارپوریشن کا متنازعہ فیصلہ
نوبت موسیقی کا فن ہے، جسے احمدآباد میں آج بھی لوگ ذوق و شوق سے بجاتے اور سنتے ہیں۔ نوبت کو تاریخی موسیقی میں شامل کیا گیا ہے۔ جسے سننے کے لئے لوگ دور دور سے یہاں آتے ہیں۔ بادشاہ احمد شاہ کی یہ وراثت آج بھی لوگوں کے دلوں میں جگہ بنائے ہوئے ہے۔
