گجرات راجیہ سبھا انتخابات کافی دلچسپ ہوتے جا رہے ہیں کیونکہ کل شام سے کانگریس کے اراکین اسمبلی کا استعفی دینے کا سلسلہ جاری ہے اور اس عمل سے کانگریس کمیٹی کا بڑا نقصان ہوتا نظر آرہا ہے۔
کانگریس ارکان اسمبلی کے استعفے کی تصدیق اسمبلی اسپیکر نے بھی کی ہے۔
گجرات اسمبلی کے اسپیکر راجندر ترویدی نے تفصیلات دیتے ہوئے بتایا ہے کہ کل شام پانچ بجے سے 9 بجے تک کانگریس کے چار ایم ایل ایز نے رضاکارانہ طور پر اپنا استعفی دیا ہے۔
راجندر ترویدی نے کہا کہ کانگریس کے چاروں ایم ایل ایز کل رضامندانہ طور پر ان کے پاس آئے تھے۔ اس کا ویریفیکیشن کرنے کے بعد انھوں نے ان کا استعفی قبول کیا ہے۔ اسپیکر نے کہا کہ اب یہ چاروں ارکان ایم ایل اے نہیں رہے۔
کانگریس کے چار ایم ایل ایز میں گڈرا کے ایم ایل اے پروین مارو، لمڈی کے سوما پٹیل، دھاری کے جے وی کاکڑیا،اور ابڈاسا کے رکن اسمبلی پردھومن سنگھ جڑیجا نے استعفی دیا ہے۔
واضح رہے کہ اس سے قبل بھی گجرات سے راجیہ سبھا کے ارکان کے انتخاب کے موقع پر زبردست ڈرامہ بازی اور سیاست دیکھی گئی تھی، اس وقت کانگریس کے ارکان اسمبلی کو بنگلورو منتقل کیا گیا اور کانگریس نے بی جے پی پر ان کے ارکان اسمبلی کو خریدنے کا الزام لگایا تھا۔
